Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 456,002 Auteur: Uc de Pena Genre: Canso Numero: CXXXVI

Si anc me fe amors que·m desplagues

I	1	Si anc me fe amors que·m desplagues,
		be·m restaura en vos, dompna, lo dan.
		sabetz per que? quar, on pus vau pessan
		vostra valor e vostra conoyssensa
	5	e·l gen parlar e·l avinen solatz,
		adoncx suy yeu pus fort enamoratz,
		et ay tal ioy, quan de vos me sove,
		qu'ades cuya mos cors trobar merce.
II		E si be·m lau d'amor, si suy yeu pres,
	10	francx et adreitz et ab humil talan,
		fis e leyals e senes tot enjan
		per vos, dompna, on pretz melhuyra e gensa.
		sabetz que·m pres? vostra fina beutatz,
		don suy aisi del tot apoderatz
	15	que ges non ai negun poder en me
		mas tan quan vos me·n donatz per merce.
III		Pero ades vos deu plazer mos bes,
		que mans ricx ioys n'aurai mes en soan
		per vos, dona, qu'autra no·n vuelh ni·n blan,
	20	tan vos suy fis ab ferma bevolensa,
		per que·m deu ben esser, dompna, si·us platz,
		grazitz l'afans que n'ay sufert en patz;
		e sufriray, tro conoscatz que be
		devetz aver d'aital amic merce.
IV	25	Anc Lanselotz, quan sa dona·l promes
		que faria per elh tot son coman,
		si·l mostrava un fin leial aman,
		no poc aver de si eix sovinensa,
		bona domna, ta fort s'er' oblidatz,
	30	tro que merces lo y ac adregz esguartz
		lay on razos non li valia re,
		per qu'ieu aten de vos aital merce.
V		Leu m'agues vos, dona, del tot conques
		lo iorn qu'ieu vi vostre cors benestan,
	35	per que·m devetz, si·us play, sufrir d'aitan
		qu'ieu ai' en vos ma lial entendensa,
		qu'autra dona no·m abelis ni·m platz
		ad ops d'amar, e si n'era forssatz
		d'amor, domna, ia per neguna re
	40	no·us prec que mais ajatz de mi merce.
VI		E selh que fa so que pot, gent e be,
		deu ben trobar ab fin' amor merce.