Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 461,017 Auteur: Anonyme Genre: Descort Numero: CXL

Amors | dousors | mi assaia

I	1	Amors,
		dousors
		mi assaia.
		valors,
	5	richors
		mi menaia.
		gensors
		que flors
		e plus gaia
	10	es sil qu'aissi m'auci e·m plaia,
		per que non vuel qu'autra m'eschaia.
		mais il me tormenta et m'esglaia,
		don sovinent
		sent
	15	martire
		consire,
		car dire
		non aus mas qu'il m'aia
		cor convinent
	20	ient, . . . .
		traire,
		delire,
		qu'ab rire
		que·n fai, mi menaia;
	25	et mi te en tal vistenca,
		que d'al non ai sovinenca
		mais de leis, qui toz iors ienca.
		et pois si·m fai apervenca
		qu'aia de s'amor tenenca,
	30	per que m'o met a sufrenca?
		car ondranca
		. . . . . . . .
		e pesanca
		mi en lanca
	35	ses doptanca,
		qu'ab semlanca
		. . . . . . . . . . .
		. . que.n fai,
		mi retrai
	40	que iamai
		no·n don desesperanca,
		per qu'atendrai
		e veirai,
		si iamai
	45	trovarai
		ab lei nulla acordanca,
		si que l'esmai
		que ieu n'ai,
		torn en iai,
	50	dun murrai,
		si non l'en pren pizanca.