Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 461,197 Auteur: Anonyme Genre: Canso Numero: CLV

Poc ve gent que l'ivers s'irais

		Li sons derves del homen sauvage.
I	1	Poc ve gent que l'ivers s'irais
		et part se del tanz amoros,
		que non au ges notes ni lais
		des auselz per vergers foilloz,
	5	per lou freit del brun temporau
		non leisserai un vers a far,
		et dirai alques mon talant.
II		Lonc desirier et griu pantais
		n'ai agut al cor cubitos
	10	vers cele qui soaf mi trais;
		maiz ainc vers li non fui greignos,
		ainz la portave el cor leial.
		mol fui legiers a enganar,
		mes peccas n'aie deus amans.
III	15	No gens per autre orgueill no·n lais
		de s'amor, dont tant sui coitous,
		et conneis ben con ben mi pais
		et sui galias a estrous.
		las! remasus sui del chabau,
	20	quant per autre non vol poignar,
		per me ni per mon drughemant.
IV		Totz meschavatz, car a gran fais
		me tieng, dosne, quan pens de vos,
		et quant n'oi parlar, m'es esglais,
	25	et ia ior no·n serai iauzos,
		qu'eu sui iras de vostre lau
		et ab ioi de vostre blasmar
		et plaisen me tuit vostre dan.
V		Non pos mudar que no.n biais
	30	vers aqueu ioi tant orgueilloz,
		qu'ainc non vi, orgueill non abais;
		quan pluz en poie, meuz ca ios;
		et est folz qui ve et qui au,
		et si non sab son meuz triar;
	35	et n'a el siegle d'aques tan.
VI		Hui mais se·n faignent, druc et lais,
		cel qui no·n estan enuios,
		qu'a toz l'esfenis et le lais
		per oc que no·n soi poderos.
	40	pos poder no i sab ben ni mau,
		ben es dreis c'on lo desampar;
		et ai me perdu mon afan.