Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 156,005 Auteur: Falquet de Romans Genre: Canso Numero: I

Ieu no mudaria

I	1	Ieu no mudaria
		q’un vers novel no comens,
		pel joy de m’amia
		qu’es pros e conhd’e valens ;
	5	ab lieys estai, on que sia,
		totz mos pens;
		entendens
		en suy e guays e jauzens.
II		Non a guair’enquera
	10	q’us orguelhs m’avia mort,
		mas trobat n’ay era
		ric cosselh que·m n’a estort
		e trag del peril ont era
		a dreg port ;
	15	be·m vai fort,
		qu’ieu ri e·m chant e·m deport.
III		Erguelh ni pezansa
		non ay, s’aver non o dey
		quar tan luenh mi lansa
	20	la bella a cuy m’autrey,
		quar amistat ni semblansa
		qu’ela·m fey
		endreg mey,
		non es qu’al cor no m’estey.
IV	25	Si nonqua·n remire
		de midons son belh cors gen,
		de lieys mi cossire
		e n’estau en pessamen
		que ves son paÿs me vire
	30	en durmen
		contra·l ven,
		tam bo mi sap quant ieu·l sen !
V		El sobran estatge,
		lai on sos gens cors fis es,
	35	ai mes mon coratge ;
		de sai li·n refier merces ;
		be m’o tengra a folhatge,
		qui·m disses
		qu’aitals bes
	40	esdevenir m’en pogues.
VI		Aras, te·y ta via,
		que tot mon cor saps, chansos !
		Mas petit m’embria,
		quar no lai anam abdos,
	45	lai on mos cors i diria
		qu’a rescos
		ab lieys fos
		lo sieus amicx fis e bos.
VII		Comtessa am cortezia,
	50	largua e pros,
		mas chansos
		fauc e sian lai ab vos.