Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,031 Auteur: Sordel Genre: Canso Numero: X

Si co·l malaus qe no se sap gardar

I	1	Si co·l malaus qe no se sap gardar
		qan es garitz, per qe·l mals lo repren
		e·l fai trop peig en son recalivar
		qe non a faich, aisi m’es pres e·m pren
	5	del mal d’amor d’un sui recalivatz:
		qar no·m gardei qan eu n’era escapatz,
		ar ai tal mal dun jamais non garai
		si no·m garis la bella per cui l’ai.
II		Pero, si tot mals es, del mal clamar
	10	d’amor non voill ges del tot garimen,
		qar totz·m es douz l’afanz per soffertar,
		qan pens qi es, ni dun, ni de qal gen
		cil per cui muor, a cui me sui donatz
		ses estraire, si·ll plai o si no·il platz;
	15	qar eu l’am tan ab leial cor verai,
		qe, s’ill m’auzi, eu la merceiarai.
III		Un pauc mi fai gilosia doptar,
		qar totz lo monz enveia son cors gen
		e qar non puosc tan valer qe triar
	20	non puosca ben amador plus valen:
		pero, s’eu fos per leis a dreich jutjatz,
		si com l’am mais en fora meillz amatz;
		mas, com qe·m n’an, sobre totz l’amarai:
		dunc falira se ves autra m’atrai.
IV	25	A, can mal vi sa cara, son cors car,
		e·l ric senblan, e·l bel aculimen,
		e·l plazen ris e l’amoros parlar,
		e·l douz esgart, e·l gai captenemen
		s’en breu no·ill pren merces! Tan soi cochatz
	30	dels mals dun sui per s’amor tormentatz,
		q’eu tem morir desiran son cors gai,
		qar loing dels oillz e pres del cor m’estai.
V		Ben dei Amor sobre totz merceiar
		qar partit a mon ferm cor e mon sen
	35	de dompn’ab cor camjan, e·m fai amar
		lei, on tuit ben son ses tot fallimen;
		qar tan la fan sos prez e sas beltatz,
		salvan s’onor, plazer, c’als plus prezatz
		aug dir q’en lei non faill ren menz ni mai;
	40	per q’eu nuillz temps de s’amor no·m partrai.
VI		Restaur, a vos mi ren a cui·m soi datz,
		e mercei lei qe·m fetz, camjan, camjar;
		q’ab son camjar si adiran mi fai
		amar qui es la plus plazen[s] q’eu sai.