Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 248,050 Auteur: Guiraut Riquier Genre: Pastorela Numero: XII

L'autrier, trobei la bergeira (1267)

I		L'autrier, trobei la bergeira
		Que d'autra vez ai trobada,
		Gardan anhels, e sezia,
		E fon de plazen maneira;
	5	Pero mont fon cambiada,
		Quar un effant pauc tenia,
		En sa fauda, que durmia,
		E filava cum membrada.
		E cugey que·m fos privada
	10	Per tres vetz que vist m'avia,
		Tro vi que no·m conoyssia,
		Que·m dis: « Lai laissatz l'estrada? »
II		— « Toza, fi·m yeu, tant m'agrada
		La vostra plazen paria,
	15	Qu'er m'es ops vostra valensa. »
		Elha·m dis: « Senher, ta fada
		No suy quo·us pessatz que sia,
		Quar en als ai m'entendensa ».
		— « Toza, faitz hi gran falhensa,
	20	Tant a que·us am ses falcia ».
		— « Senher, tro en aquest dia
		No·us vi, segon ma parvensa ».
		— « Toza, falh vos conoyssensa? »
		— « Senher, non, qui m'entendia »
III	25	— « Toza, ses vos no·m poiria
		Res dar d'aquest mal guirensa;
		Tant a que m'etz abellida »,
		— « Senher, aital me dizia
		En Guirauts Riquiers ab tensa,
	30	Mas anc no·n fuy escarnida ».
		— « Toza, ·N Guirauts no·us oblida,
		Ni·us pren de mi sovinensa? »
		— « Senher, mai que vos m'agensa
		Elh e sa vista grazida ».
	35	— « Toza, ben trop l'es gandida ».
		— « Senher, si ven, be cre·m vensa ».
IV		— « Toza, mos gaugz se comensa
		Quar selh per qui etz auzida
		Chantan suy hieu, ses duptansa ».
	40	— « Senher, non etz, ni crezensa
		No n'auria e ma vida
		Ni neys no n'avetz semblansa ».
		— « Toza, Belhs Deportz m'enansa
		Que·us es tres vetz aütz guida ».
	45	— « Senher, res non es la crida,
		Trop vos cujatz dar d'onransa ».
		— « Toz', avetz de mi membransa? »
		— « Senher, oc, mais non complida ».
V		— « Toza, ye·us ai embrugida
	50	E tenc m'o a gran pezanza;
		No·us pessetz pus vos enqueira ».
		— « Senher, be·m tenc per fromida
		Qu'eras ai preza venjansa
		De l'autra vista derreira ».
	55	— « Toz', ab qui etz parieira
		En l'efant? Es d'alegransa? »
		— « Senher ab selh, qu'esperansa
		N'ai de mais, que·m pres en gleira ».
		— « Toza, quo·us giec en ribeira? »
	60	— « Senher, quar es ma uzansa ».
VI		— « Poiriam far acordansa
		Amdos, toza plazenteira,
		Si n'eratz per mi celada? »
		— « Senher, non d'autr' amistansa
	65	Que·ns fem a la vetz primeira,
		Pus tro aissi·m suy gardada ».
		— « Toza, be·us ai assajada,
		E truep vos de sen entieira ».
		— « Senher, s'ieu ne fos leugeira,
	70	Mal m'agratz vos assenada ».
		— « Toza, vau far ma jornada ».
		— « Senher, mete·us en carreira! »