Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 082,014 Auteur: Bertran Carbonel Genre: Tenson fictive Numero: VIII, 2

Si anc null tems fuy ben encavalcatz

I	1	Si anc null tems fuy ben encavalcatz
		Ni per midons mi diei alegrament,
		Ronci, per vos mi er tot joy tornatz
		En gran dolor et en gran mariment,
	5	Que tan trotatz tatot enoyament
		Aves adug lo meu cors ses duptansa.
		Per cert vos dic que s’en la commensansa
		Vos conogues, per vos pezant d’argent
		Nos menara, tan mi das grieu turment.
II	10	— Amixs Bertran Carbonel, cert sapchas
		Qu’ieu soy fort(z) viels, e qui en son jovent
		Ben non aprent non er ga enseinhatz
		Can sera viels, ni am bon noiriment.
		Com amblarai ? Qu’ieu ay ben verament
	15	Tirat .x. ans la carreta en Fransa ;
		Per Dieu vos prec que vos des alegransa,
		Que so per que vos annas sertament
		Cobrares tost, si dreg nous va fujent.
III		— Si dreg mi fug lo sera gran peccatz, (f. 16)
	20	Mas ieu aug dir que per home vivent
		Le juges d’Aixs, tan es lials clamatz,
		Non yra ja mas drechura segent ;
		S’aiso non fos mort [t’] agra mantenent.
		Mais, pos ti plas qu’ieu sufra malanansa,
	25	Per Dieu ti prec e per drech’ amistansa,
		Pos non amblas quem portes plan e jent;
		Sol non trotes ieu auray guariment.
IV		— Amixs Bertrand, ben jent fatoejatzs,
		Quom pogues dir qu’ieu vagua planament,
	30	Que von plus vauc e vos plus mi brocatz !
		Voles vos doncs que ieu vagua corrent ?
		Per cert vos dic, pois no i trop chauziment,
		Ieu farai so qu’uns pauc verset romansa :
		« Am los grieus greus », aital dic per semblansa :
	35	Si vos m’est greus ieus portaray greument,
		E si m’est bon et ieu bon eisament.
V		— Rocin, el mon non es major foudatz
		Que quant lo freuls pren am lo fort content ;
		Don es ben ies tu fols ez outracujatz
	40	Que tu a mi respondas follament.
		Non sabes ben qu’eu puesc leugieirament,
		Si a mi plas, de tu penre venjansa ?
		Estai en pas e non dire pezansa,
		Mas si vezes bon conseilh ni valent
	45	Dona lo mi, ieu t’o prec carament.
VII		— Amixs Bertran, motas ves can parlatz,
		Valria mais estases suau(s)ment.
		Tot l’an dizet que totz noms faill asatz
		Mais quan reprent, cant el faill reprendent,
	50	Que le repres ; doncs per pauc aves sent
		Car d’aquest plag vos non fag accordansa,
		Que vos est freuls, l’autra ha aondansa,
		D’aur et d’arjent e aras majorment
		Que ven lo coms de Vellin ab gran jent.
VIII	55	— S’ieu pogues far acordi bonament
		Ieu lo fera, mas negun’ acordansa
		Per sagrament non vol far, ses duptansa,
		Tro al venir del pro comte valent
		Conseillas mi que ieu l’an atendent ?
IX	60	— Bertran, bon es l’atendre sertament ;
		Si non l’atens tu faras gran enfansa,
		E si l’atens le coms n’aura legransa,
		E majorment d’aquest nostre content,
		Per qu’ieu conseill que l’en fassam prezent.
X	65	Tenson, vai t’en ad Albainia corrent,
		Ez aqui tu apenras ses duptansa
		Von es le coms, e pueis ses demostransa
		Tu li vai dir qu’ieu li prec humilment
		Que mi pagues, e faria ben e jent.