Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 381,001 Auteur: Ponson Genre: Canso Numero: XII, 1

Ben dey viure tostemps am gran dolor

		E[n] PONSON. (f. 24 vº)
iiij.
I	1	Ben dey viure tostemps am gran dolor
		Car temens soy tant que non auze dir
		Mon corage, ni ai poder quem vir
		De leis quem ten enlassat en s’amor,
	5	Quel cors el cor es tot en sa plevensa ;
		E sill plagues quem des en penedensa,
		Quel gran afan me fos en rezemson
		De mos peccats, vengr’ a salvacion.
II		S’il volgues far qu’en signe de s’amor
	10	Ilh mi sones cant son gen cors remir,
		Mon esperit fera tot reverdir
		Com fay le ros cant chay sobre la flor,
		E fera .j. ves amo[r]s conoisensa,
		E ja nulh tems de sa hobediensa
	15	Non partira, an[s] fora son guarson
		Per far e dir tot so quel fora bon.
III		Si a mi dons, qu’es digna de lauzor,
		Plagues de far quem volgues per servir
		Son gentil cors per qu’ieu soven sospir,
	20	Adoncs agra leis qu’es mielhs del milhor ;
		Don l’en soplei lials amors l’en vensa,
		Car non es res aitals en ma crezensa
		Qu’a bon’amor deya dire de non,
		Essi o fa ja Dieus non li ho perdon.
IV	25	Tant vey en luy beutat e gran valor (f. 25).
		Que dupte ay que autre non la tir,
		Et ieu, chaitieu ! D’amor non puesc partir
		De son gen cors, ans mot soven en plor,
		E de ren als nuls tems mon cors non pensa.
	30	Car comprarai sa longua atendensa
		C’ai fagz de luy en qui trastotz bens son
		Se non m’en rent alcun bon guizardon.
V		Sil sieu valors breumens non mi secor
		Ben vuelh sapcha que ieu mezeis m’azir,
	35	E lais donney, e vuelh trop mais morir
		Que si, vivent, vivia sens s’amor,
		Mas sin valgues la sieua gran valensa
		Fora valens e valgra ses failhensa
		Le sieus valers plus que nuilh autre don,
	40	Sia de rei o d’autre gran baron.
VI		Chantar, vay t’en a leys que plus m’agensa
		Que nulh’ autra que sia en Proensa,
		E diguas li qu’en luoc de guarizon,
		Si a luy plai, mi mande hoc vo non.