Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 050,002 Auteur: Berenguier Trobel Genre: Sirventes Numero: XIV, 1

Si vols amixs al segle guazainhar

		BERENGUIER TROBEL (f. 10 v°).
I	1	Si vols amixs al segle guazainhar
		Ni vols l’amor d’un ric home valen,
		Tantost sapchas qual(s) sunt siey complimen
		Ni’n qual fag vol ades perseverar :
	5	Que si el es fols, tul contrafay follia,
		Segon son sens te camga e de[s]guia ;
		Ya de sos aips non fassas destrians,
		Si non t’era ancta, blasme[s] o dans.
II		En tots solats mi sapchas bel intrar,
	10	Segon quez er l’uzage de la gen ;
		Al mercadier parla d’aur e d’argen
		Et al gentil de guerra o d’amar
		Et al letrat de plag o de clerzia
		Et al prodoms del vent o de la biza ;
	15	Am donzelas parla deports et chans,
		An donnas tien solas de lurs enfans.
III		L’amic que sols am fizel cor amar (f. 11)
		Yras tot jorn, ses aenprar, sirven,
		E pauc e pauc compliras son talen ;
	20	Pueis, cant er luocs, sapchas los sieus honrar ;
		E si fay ren que ben ne gent no ’stia,
		Mos bels amixs, per vos selat non sia,
		Que a rescost li sias remenbrans
		Sos malvais ayps, si n’era frequentans.
IV	25	Tostemps vueilhas ton amic razonar ;
		Si per nulh fag lo seq defamamen,
		E trobe t’on membrat et an bon sen,
		Que totz blasmes sapchas davant ostar.
		En sos destrics per tu visitat sia,
	30	E s’om li fay nil dis sobransaria,
		Sequore li demanes o delans,
		Qu’atresi pos d’el esser bezoinhans.
V		L’amic qu’auras conquist sapchas gardar
		Que(l) nol perdas per nulla ren vivent,
	35	Al sieu tort dic, et al tieu majormen ;
		An[s], si fai mal, li o vuelhas perdonar,
		Et s’as failhit, vas luy tant t’umilia
		C’an tos bels ditz l’apaya e l’enebria,
		Tan que del tort ti sia perdonans ;
	40	Aisi seras de vers amics sobrans.
VI		Pueis qu’en amor l’auras sauput liar
		De sos secrets espia ez apren,
		Dizen del tieu amesuradamen,
		Que non sapcha(s) ton perilhos afar.
	45	Aisil mostra ton cor el signifia,
		Que si l’amor mermava o moria
		O per null cas t’era contrarians,
		Si sap ton cor sapchas del sieu dos tans.
VII		Sapchas valer segon ta manentia
	50	E nol fassas ni diguas vilania,
		Et honra fort los petits e los grans,
		Pueis serant tuit(s) de t’amor desirans.
VIII		Esforsa te d’estar en bona via
		E lauza Dieu(s) e la verges Maria,
	55	Apren dels viels, enseinha los enfans ;
		Aisi poiras passar termes et ans.