Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 379,002 Auteur: Anonyme Genre: Canso Numero: XXI

Si ay perdut mon saber

xvij.
I	1	Si ay perdut mon saber (f. 30).
		C’a penas say von m’estauc,
		Ni say don venc ni hon vauc
		Ni (say) que fas lo jorn nil ser,
	5	E suy d’aital captenensa
		Qu’ieu non veilh ni puesc dormir
		Nim play viure ni morir
		Ni mal ni ben non m’ajensa.
II		An perpauc non deszesper
	10	Vo morent mozent a guau
		Vo no[m] met dins una frau
		Von hom non pogues vezer
		Car trazit suy ez en enza
		Per leys qu’ieu am e deszir
	15	Quem fay sospirant languir
		E me frainh ma(s) covinensa.
III		Jamais non cuh joy aver (vº)
		Ni estar .j. jorn suau
		Pos mi dons m’a solas brau,
	20	Quem torna e non chaler ;
		Et ai eu major guarensa
		Cant ieu mi pens nim consir
		Col pogues en grat servir ;
		Adoncs creis sa malvolensa.
IV	25	Per ren nos puesc estener
		Qu’ieu non l’am e non la lau,
		Car la jenser c’on mentau
		Es, e son ment ans dic ver,
		Am que prezes penedensa
	30	Del grieu may quem fay sufrir ;
		E sim denies grazir
		Agra complida valensa.
V		A gran tort mi fay doler
		Si fos pendut en un trau ;
	35	S’anc pueis nulh ben ni reclau
		N’ac pueis m’ac en son poder
		Ni fis endreg luy failhensa,
		Ma[s] sol d’aitant, so m’albir,
		Car la tem non li aus dir
	40	Com li porte benvolensa.
VI		Qu’ieu suy cel que non men tensa
		Vas midons ni non m’ azir
		Ni vueil de ren enardir
	44	Mas de so c’a leys ajensa.