Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,010 Auteur: Giraut de Bornelh Genre: Canso Numero: III

Ans que venha·l nous fruchs tendres

I	1	Ans que venha·l nous fruchs tendres
		Ni·l sobrefais brondels baisse,
		Plei mo coratg’e l’amas
		Vas un’amor e l’assenh.
	5	Si tot lo m’avi’espars
		Per mantas contradas lonh,
		Volh qu’era·s vir e s’arenh
		D’altr’obr’e d’altre chaptenh.
II		Et enaissi frescs es tendres
	10	Que per malpas ni per raisse,
		Si be·m va len ni de pas,
		No·m lais a virar l’engenh
		Si que·l plus de mos afars
		Poscha tornar a nosonh !
	15	Que lai vir la fors’e·l genh
		O·ls olhs e·l coratge tenh.
III		E si m’est amics, no·n tendres
		Ni·t pes, qui que t’en so d’aisse,
		So qu’era ves ni veiras :
	20	C’Amors me coch’e·m destrenh.
		E si·m n’er’estranhs ni pars,
		Era, pos sai vir e ponh,
		Convenra c’al seu senh renh
		E·ls altres torn en desdenh. —
IV	25	Car de filhas a dos gendres,
		Pot om greu far no s’abaisse
		Vas l’un que chascu ser as ? —
		Si grans forsa no m’empenh
		C’alhors me fass’amics chars. —
	30	E s’aissi fin’es, essonh
		Mostres volers ! — No·i retenh,
		Mas que·l me vend’o m’empenh.
V		E si·l malvatz crup-en-cendres
		S’enardis qu’en lais s’eslaisse,
	35	Vils sia tengutz o bas;
		C’aissi desfil’e destenh
		Dezafrenatz domneiars
		Qui·l pretz no·i garda ni·l sonh.
		E s’eu a mos precs avenh,
	40	No·m vendra be qui be·m penh ?
VI		Per trussar ni per divendres
		No·m destric que non engraisse,
		Si·l seus cors delgatz e gras
		M’es de pres, c’aissi revenh,
	45	Si be·m n’ave greus parlars ;
		Car ges monge de Cadonh
		No·s fion en entresenh,
		C’a ver nesci m’en depenh.
VII		E cui parra greus l’aprendres
	50	De mo chantar, no s’en laisse,
		Si no·l sui del dir eschas,
		C’ab fi coratge l’ensenh,
		Si tot Mo-Senhor no m’ars,
		Si cuda que fass’ab onh ;
	55	C’aissi l’escur com ebenh :
		Mo trobar ab saber prenh!
VIII		Can l’altre s’en van, eu venh,
		Si Deus la·m salf e la·m senh !