Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,008 Auteur: Giraut de Bornelh Genre: Canso Numero: VI

Amars, onrars e charteners

I	1	Amars, onrars e charteners,
		Umiliars et obezirs,
		Loncs merceiars e loncs grazirs,
		Long’atendens’e loncs espers
	5	Me degron far viur’ad onor,
		S’eu fos astrucs de bo senhor ;
		Mas car no·m vir ni no·m biais,
		No vol Amors qu’eu sia gais.
II		Pero mos sens e mos sabers
	10	E mos parlars e mos be-dirs,
		Mos esperars e mos sofrirs
		E mos celars e mos temers
		M’agron totztems onrat d’amor,
		S’eu perchasses mo ben alhor ;
	15	Mas cilh que·m ten en greu pantais
		No vol qu’eu l’am ni que m’en lais.
III		E si·lh plagues mos enquerers
		Ni mos preiars ni mos servirs,
		Ja·l trop velhars ni·l paucs dormirs
	20	Ni·lh mal qu’eu trac matis e sers
		No·m pogron ja partir de lor;
		Ans m’agra jois per servidor
		E ja no·m fora greus lo fais
		Ni·l mals c’al cor me brolh’e·m nais.
IV	25	Per qu’eu conosc e sai qu’es vers
		Que viure·m val menhs que morirs ?
		Pos que·lh sofranh jois e jauzirs
		E·m falh amors e sos poders !
		Per qu’eu sospir e planh e plor ?
	30	Car jois no·m val ni no·m socor ;
		Qu’eu sui aquel c’am melhs e mais
		E no manei ni tenh ni bais.
V		Era·m combat sobrevolers
		E sobramars e loncs dezirs
	35	E fa·m chassar sobrenardirs
		E foleiars e no-devers
		So que no tanh a ma valor,
		E s’eu volh trop per ma folor,
		Mos sens en par alques savais ;
	40	Mas eu remanh fis e verais.
VI		Car ma semblans’e mos parers
		E mos cudars e mos albirs
		M’an dich totztems c’altr’enriquirs
		Ni altr’onors ni altr’avers
	45	No·m podon dar tan de ricor
		Com cilh que·m fai viur’ab langor
		C’on plus languisc e dezengrais,
		Cut et aten c’a me s’abais.
VII		Domna valens, vostra valor
	50	E vostre pretz e vostr’onor
		Poiatz totztems e valetz mais,
		Per qu’eu vos sui fis e verais.