Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,070 Auteur: Giraut de Bornelh Genre: Canso Numero: XVI

Si·l cor no·m ministr'a drech

I	1	Si·l cor no·m ministr’a drech
		E mal so grat no l’afranh
		En un chantaret sotil,
		No m’es vis qu’era s’afranha,
	5	Si no m’esfors’atz,
		En aitals motz peceiatz.
		Ja fo que·m n’entremetia
		Plus qu’era no fatz,
		Car melhs me lezia,
	10	C’a penas om conoissia
		Mos leugers dichs enversatz
		Sotils e menutz soudatz.
II		E si·l chantar lais per frech,
		Don manta gens se complanh,
	15	Ni n’ai mo conort plus vil,
		Ben estara que·m sofranha,
		Can venra l’estatz,
		Jois e deportz e solatz ?
		E pos d’avol companhia
	20	No·m tenh per paiatz,
		Si chantar gurpia,
		Diatz ab que·m defendria
		Dels avols mal ensenhatz,
		Que·m fan peitz que neus ni glatz !
III	25	E s’acors del cors adrech
		Ab que·m conort e·m refranh
		No me ve sai part l’abril,
		Al torn que farai d’Espanha,
		Ja lai no crezatz
	30	Que flors ni vergers ni pratz
		Gaire m’aiut ni bo·m sia
		Ni·l chans pels plaissatz,
		Ni d’altrui paria
		No m’a grat tan com solia
	35	Ni·m tenh per assolassatz,
		Per qu’eu·n prenc mans breus comjatz.
IV		Pero, si m’a·l mon estrech
		C’a plana fors’i remanh,
		Garatz, s’en un pauc cortil
	40	N’agra ja trebalh ni lanha !
		Molt es malmenatz
		Totz om sobrenamoratz ;
		Qui per aitan no·s chastia,
		Ja·l plus veziatz
	45	No conoisseria,
		Si·s tarza ni si s’embria
		Sos bes ni sa volontatz,
		Pos be n’es apoderatz.
V		E car no n’esper esplech
	50	De m’amia, cui no tanh
		Que tan s’abais ni s’umil
		Ja m’acolh’en sa companha,
		Pro sui bemenatz,
		Si·m denha sofrir ni·lh platz
	55	Qu’en mos chantars l’apel mia.
		Per Deu, be sui fatz
		E dic gran folia !
		Per cal razo sofriria
		Que·m fezes tan sos privatz,
	60	E doncs que·m n’aconselhatz ?
VI		C’aissi·m ten Amors destrech
		Qu’entendeire ses gazanh
		Sui d’un ric loc senhoril
		Celat e de terr’estranha,
	65	Don no sui chazatz,
		Per que·m par nescietatz
		Qu’eu chan, si no m’en venia
		Gazardos o gratz.
		Pero si·lh plazia
	70	C’apeles per cortezia
		Seus mos chans dezamparatz,
		Alt los m’auria levatz.
VII		E mostra·m com m’en venria
		Jois e bes devas totz latz,
	75	Si·l chan me sofri’en patz.