Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,004 Auteur: Giraut de Bornelh Genre: Canso Numero: XX

Aital chansoneta plana

I	1	Aital chansoneta plana
		Que mos filhols entendes
		E chascus s’i deportes,
		Fera, si far la saubes ;
	5	Mas no·i posc esdevenir,
		Que d’alres consir,
		On m’aten mais.
II		Trop m’es m’amia lonhdana,
		Vas que·l dezirers m’es pres,
	10	E no sai consi·m crezes
		Que nostr’amors s’avengues.
		Pechatz la·m fetz encobir
		Qu’er m’en a morir,
		Coras que·m lais.
III	15	Si·m fos d’amar tan umana
		Com eu sui, be cut m’ames.
		De talan volgra·m chamjes !
		Bo·m fora, s’a leis plagues ;
		Mas alhons se fai grazir
	20	Tan que·m par que·s vir,
		E vira·l jais !
IV		Non es amors per ufana,
		Mas no vol qu’eu m’en vanes ;
		Pero si·m dis que chantes
	25	Si c’om non o conogues,
		E, pos ven, o sai cobrir,
		—  Ja no se n’aïr ! —
		S’eu m’en sui gais.
V		De loncs tems non agra chana,
	30	Si s’amor no m’enveies ?
		No ja, si totztems visques !
		E fora jocs, s’ilh temses
		Que·m volgues de leis partir ;
		Eu no volh ges dir
	35	Qu’es en biais.
VI		Si noca s’es chastelana,
		Mais l’am que tal que·m laisses,
		E, ja res de que cudes
		A cocha no paregues,
	40	Be·s deu om d’aisso servir
		Voler e jauzir,
		Ans que·s n’abais !
VII		Per pauc ma boccha no vana,
		Si·l cor tan non o doptes,
	45	D’aco don consir ades
		E, que ja no·m vengues bes,
		Leus sui ad enfoletir.
		Ab so gen mentir ;
		Qu’ela m’atrais !
VIII	50	Lai on pretz floris e grana,
		Volgra trobar qui·m portes
		Mo sonet e no·n mudes
		A Mo-Joi e no disses
		Que·m cudes engasconir,
	55	Mas er mo fre vir
		De sai Chablais.
IX		Bela, sai en Vianes
		No volh mais joia gequir
		Ni engasconir,
	60	Per que·m n’apais.