Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,013 Auteur: Cadenet Genre: Sirventes Numero: V

De nuilla ren non es tan grans cardatz

I	1	De nuilla ren non es tan grans cardatz
		cum d’omes pros, e car n’es carestia.
		fai a plaigner us pros, qan se cambia.
		et eu dic lo pel vescomt de Burlatz,
	5	c’auzit ai dir q’es de bon pretz camjatz,
		car no·il platz jes aitan cum sol valors.
		eu non dic jes per so q’a mal s’o tegna,
		enanz o fatz per respieich que reveigna,
		que vida es anta e desonors
	10	qui non a pretz segon q’es sa ricors
II		Ja non er hom tant pros ni tant prezatz
		que non aia blasme de cui que sia ;
		e si us fols li ditz mal per foillia,
		jes per aisso no·is tenga per blasmatz ;
	15	enanz s’en deu tener per ben lauzatz,
		que blasmes es del fol al pro lauzors ;
		per q’ieu li prec que mon cosseil reteigna
		e cum se sol captener, se capteigna,
		e laisse dir als nescis lor follors,
	20	qe·il conoissen en diran pro d’onors.
III		Q’ieu ai auzit mal dire d’en Blacatz,
		que per aisso no·is refrenet un dia,
		e d’en Raimon Agout, que tant valia,
		e del marques de cui fo Monferratz,
	25	que per aisso no·n semblet nuills iratz
		ni no·n tolgron benfaich a cantadors.
		pauc vos ama, en vescoms, qui vos enseigna
		que de ben far ni de pretz no·us soveigna ;
		leu aura faich vostre fins pretz son cors.
	30	si non avetz amics e lauzadors.
IV		De las dompnas mi platz be lor honors
		de Caercin, e voill mal als seignors.