Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,019 Auteur: Cadenet Genre: Canso Numero: VI

Pos jois mi met en via

I	1	Pos jois mi met en via.
		ben dei derenan
		demonstrar mon talen,
		que ves tal s’umelia
	5	mos cors qu’en semblan
		non lo·i aus far parven.
		pero Amors dona·m tan d’ardimen
		que de leis chan, e no sabretz qui sia,
		c’a totz ho vueill celar comunalmen ;
II	10	Car trop gran vilania
		es qui·s vai vanan
		per outracujamen ;
		mas ieu n’ai maestria
		ab que·m gart de dan ;
	15	e trop, mon essien,
		qu’ieu sai mentir, e ver dir pus soven,
		e, quan me vueill, e la vertatz es mia,
		e quan ops m’es, la mensonja·m deffen.
III		Dona, ves on qu’ieu sia,
	20	. . . . . . . . . . . . . . . . . . .
		vos mi don e·m prezen,
		qued autra senhoria
		non vueill ni deman
		ni anarai queren.
	25	mais vueill estar al vostre mandamen
		que d’autr’aver s’amor ni sa paria.
		faitz e diguatz de mi vostre talen !
IV		E qui ren vos dizia
		de mi lauzenjan,
	30	tant vos sai conoissen
		que ja dan no·i auria.
		e quar eu dic tan,
		sai que fauc faillimen,
		qu’ieu vos am, pros dona, coralmen,            (— 1)
	35	que res el mon albirar non poiria
		l’amor part del trop mieils qu’ieu n’enten.     (— 1)