Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,003 Auteur: Cadenet Genre: Canso Numero: IX

Anz ome meilz non vai

I	1	Az ome meilz non vai
		de mi, segon qu’eu cre ;
		e dirai vos de que :
		de pauc de joi qu’eu ai
	5	aus esser benananz,
		e mi sai esjauzir ;
		et anc no·m saup marrir,
		se·m venc destrics ni danz,
		anz saup pensar aitan
	10	don m’alegres gaban.
II		Nuill amador non sai
		que s’er’en loc de me,
		que dones a gran re
		tan com eu fatz de jai.
	15	tan mi platz jois e chanz :
		quan vei las flors venir,
		donc me cug enrequir.
		et es us conortz granz
		de flors, quan bon temps an.
	20	que ja non failliran.
III		Omn’i a que s’estrai,
		cant a servit, dese,
		se·lguierdo no i ve ;
		mas lo savis retrai
	25	c’„us jors val mais c’us anz“;
		e qui prent a fugir,
		can se deu enantir,
		no·ll es negus enanz
		d’azo qu’a fag denan,
	30	anz a perdut aitan.
IV		Ja qui so que deu fai.
		no fallira per re
		qe no ll’en prenga be.
		eu, que proat lo ai,
	35	sai que bos es affanz
		et esfortz de servir
		per respieg de jauzir.
		e jois val meilz dos tanz
		qu’es conquis ab affan
	40	que l’autre joi non fan.
V		Pros domna, talan n’ai
		qu’eu vos prec per merce
		(car sai c’a vos conve),
		que non fassatz, se·us plai,
	45	sens lo cor los senblanz
		que·m faitz, can vos remir ;
		que, quan me cug partir
		e lors s’i mescle enjanz,
		esgardatz en de dan
	50	vos e mi e mon chan !
VI		Domn’ab fin pretz verai,
		lo gaug etz que·m mante
		can de vos me sove,
		qe, cant parti de lai :
	55	„ab plazers benestanz !“ —
		— „merce ! quan dei partir ?“ —
		mas, quan m’en voill venir :
		uns enfanz de dos anz
		enanzser’atrestan,
	60	si·m segues mon talan.
VII		Lauzengiers, ges grazir
		no·uspuosc, ni no·us sai dir
		las bellas honors granz
		que vos mi fatz tot l’an
	65	a mi et a mon chan.