Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,017 Auteur: Cadenet Genre: Canso Numero: XII

Non sai cal conseill mi prenda

I	1	Non sai cal conseill mi prenda.
		totz sui esbahitz,
		si mos astres m’es failliz
		no, tan fatz long’atenda ;
	5	c’ab dir de no mi mescla bel semblan
		cill quez ieu blan, e d’aisso vau doptan.
		cal creirai mieills : o so quez eu l’aug dir
		o·l bel semblan qe·m fai qan la remir ?
		que·l bels semblans mi loigna del esmai.
	10	e·l dirs de no mi torna sempres lai.
II		Ges non cuidetz q’ieu entenda
		per lo non qe·m ditz
		qu’il sia enganairitz ;
		ni·s taing ges q’ieu la·n reprenda,
	15	car dompnas son costumadas d’aitan,
		qui las enquier, d’escondir lur talan ;
		pero li huoill non volon ges mentir ;
		ni non cuidetz que ja dompna los vir
		tant doussamen mas vas so que li plai.
	20	doncs creire dei lo bel semblan qe·m fai ?
III		Ben sui fols q’en lieis m’entenda,
		que, on plus s’esditz
		et on plus sui afortitz,
		et ill plus fort si deffenda.
	25	s’ill a faisson plazen ni ben estan
		ni·l bel semblan, per aco q’ie·il deman,
		ill non pot ges sa faisson desmentir
		ni·l bel semblan per mi de si partir. –
		fatz hi que fols, car l’am ? – ieu non o sai,
	30	mas semblan m’es, segon qu’il me retrai.
IV		Ar cre qe·m fara esmenda
		dels mals c’ai sentitz,
		midons, c’us esqerns voutitz
		mi fai cum mieills m’i enprenda.
	35	per que ni cum mi vau desconfortan ?
		dei creire doncs q’ella fassa engan
		vas si eissa per cor de mi trahir ?
		d’engan, per ver, no·is poiria esdir,
		puois ab semblan d’amor a si m’atrai,
	40	si·m faillia del tot; mas no·ill eschai.
V		Gran paor ai, no·i mesprenda
		car sui tant arditz,
		. . . . . . . . . . . . . . . . . . . . . . . . . .
		. . . . . . . que merces no·i dessenda
	45	e que no·m don ren d’aisso qe·ill deman.
		estara·ill mal ? — non, car m’o dis denan.
		mas ieu m’esfortz per so de lieis servir.
		et ill vol o ; e gart si de faillir,
		que guizerdos rendre lai on s’eschai.
	50	es genta res. e laida on s’estrai.
VI		Ab que sos rics pretz s’estenda
		e qe si’auzitz,
		no·ill cal s’ieu m’estau marritz
		o cum que an ma fazenda ;
	55	c’a lieis es bon q’ieu traia tot l’afan,
		et a mi plai qan trac son pretz enan ;
		a lieis es bon qan mi pot far languir,
		et a mi plai qan la puosc enantir ;
		a mi es bon de lieis qan ben li vai,
	60	et a lieis platz de mi qand mal m’estai.
VII		De ma filla la comtessa puosc dir
		q’en Alvergne fai son fin pretz grazir,
		et honret me la soa merces lai ;
		mas lausengier m’onron atretan sai.