Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,004 Auteur: Cadenet Genre: Canso Numero: XV

Az ops d'una chanso faire

I	1	Az ops d’una chanso faire,
		ses plus, ai bona razo ?
		pero si dic ieu que no.
		no sui amatz ni amaire ;
	5	quar Amors m’a donat poder
		d’amar, e, si m’en vueill tener,
		atressi ai poder que·m lais.
		ve·us tot lo joi c’aurai huei mais :
		que far puesc a ma voluntat,
	10	e no·m ten destreg ni forsat.
II		Ara·m vueill d’amar estraire
		e partir d’amor ; e so
		mal paguatz, dirai vos ho,
		e de midons cais clamaire.
	15	anc ilh no·m fes d’amor plazer
		de qu’ieu li deia grat saber.
		e si fui tant per s’amor gais !
		e si·m donet e pueis m’estrais
		aco eis que m’avia dat,
	20	razos es qu’ela·n perda·l grat.
III		Jois et ira fan repaire
		de mi en aital faiso
		que soven m’es mal e bo
		so que m’auziretz retraire :
	25	bon m’es, quar es a mon voler ;
		atressi mal mi deu saber,
		quar so que plus volria, ·m lais.
		aisi mi ten ira e jais
		ades d’una guiza temprat :
	30	ni trop jauzen ni trop irat.
IV		Segurs fora de mal traire
		meils que anc negus no fo,
		s’ela m’agues dat lo do
		que dona non pot desfaire. —
	35	ieu non cugera ja vezer
		l’ora que pogues tan voler
		com : de leis feira, un sol bais !
		e per aiso, ni meins ni mais,
		que sieu m’a clamat,                                      (— 3)
	40	pro·m cuj’aver guazardonat !
V		S’anc mos erguells mi fes faire
		vas vos, dona, faillizo,
		per merce·us en quier perdo,
		e que no·us voillatz estraire
	45	d’amar mi, c’avetz en poder
		per far trastot vostre voler.
		don’ ab bels digz francx e verais,
		non crezas lauzengiers savais.
		mon cor aves pres e liat
	50	per far la vostra volontat.
VI		Lauzengiers, de vos mi lau mais
		que de cela per qu’ieu soi gais,
		quar ela m’a de si lonhat
		e vos gent cubert e celat.