Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,018 Auteur: Cadenet Genre: Canso Numero: XVII

Oimais m'auretz avinen

I	1	Oimais m’auretz avinen
		de chantar e de solatz
		vos autre, a cui jois platz,
		car tant trob de chausimen
	5	qu’emendamen n’ai sivals ;
		e si·m creissia·l cabals
		de joi, mais m’alegraria,
		non ! per tant que be sabria
		mon cor destreigner d’aitan
	10	que ja nuills hom al mieu chan
		gran joi non conoisseria.
II		Pero chantan e rizen
		pot estar qetz e celatz
		qui savis es ni membratz.
	15	et eu sui ben d’aital sen,
		que no·m es hom tant corals
		que no·m sembles desleials
		puois ja mon joi m’enqerria ;
		e cel qe mais cuidaria
	20	saber mon cor demandan,
		sabria·n al cap del an
		aitan cum al primier dia.
III		En ren, al mieu escien,
		non a ops hom miells senatz
	25	qu’en amor, car, si amatz
		et etz de leugier talen,
		seretz de parlar venals,
		e de trop parlar ve mals.
		sabetz cals ? pert n’om s’amia,
	30	per que senz i taigneria
		que capdeles lo talan,
		c’aisi vai amors enan,
		e dechai per leugaria.
IV		Oi non ai ren tan plazen,
	35	dompna, cum qan m’esgardatz,
		ab qe·l cor m’aia mandatz
		los huoills, c’als non vauc queren.
		ai ! q’ai dig ? etz vos doncs tals
		que ja·m fassatz semblan fals ?
	40	vos non, pero tant volria
		jauzir, dompna, si·us plazia,
		ensems lo joi e·l semblan
		qu’ieu en tem, qar o vuoill tan ;
		sol per aisso dic foillia.
V	45	E·us am per vostre joven,
		e·us am car hi es beutatz,
		e·us am car ades genssatz,
		e·us am per vostre cor gen,
		e vos am car etz leials,
	50	e·us am car etz cabals,                         (— 1)
		e·us am per vostra coindia,
		e·us am per plazen paria,
		e·us am car etz ses engan,
		c’aissi etz fait’a garan
	55	que mais ni meins no i taignia.
VI		. . . . . . . . . . . . . . . . . . . .
VII		Si·l reina no sofria
		valor, del tot decharia,
		Helionors, que regnan
	60	ab honor, e si gardan,
		meillura de pretz qec dia.