Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,020 Auteur: Cadenet Genre: Canso Numero: XXI

S'ieu ar endevenia

I	1	S’ieu ar endevenia
		en far chansson plazen,
		meravilla seria,
		tant mi vai malamen.
	5	voluntiers m’en sofrira
		de dire cossi·m vai,
		q’ieu no m’en descobrira,
		mas l’amoros e·il gai
		dirian : „e que fai ?
	10	meravillas n’avem tuich gran,
		segon que·s era gais antan,
		cossi pot esser que non chan.”
II		C’una dompna servia
		de bon cor leialmen
	15	tant qu’en bon pretz l’avia
		pojad’. Era dissen.
		con o poirai far d’ira ?
		car liei cui servit ai
		de bon cor, e servira,
	20	desam, car o forfai,
		car atressi s’eschai,
		n’aia·l blasme, qan fai engan,
		cum pretz an cellas que ben fan.
		per so iratz sui de son dan.
III	25	Dirai una feunia
		(c’om iratz non a sen)
		contra ma cortesia ?
		per so car no m’es gen,
		si pogues, la·n cobrira ;
	30	mas ja non l’amarai,
		puois ill eissa s’azira.
		sabetz cal conort n’a
		en que·m conortarai ?
		eu n’aic de bels plazers enan. —
	35	qu’ilh agues mas un sol talan ! —
		sa foudatz m’en fai dir aitan.
IV		Mi e·l bon pretz c’avia,
		a perdut veramen
		e·l ben c’om li dizia.
	40	gardatz cum mal l’en pren !
		que qui la vi, ·s plevira
		antan e mais en lai
		que ja mais non faillira.
		et ieu com o farai ?
	45	cossi m’en vengarai ?
		puois tant m’a faich mentir lauzan
		que s’ieu dic de mal altretan.
		aco·m sera plus mal-estan.
V		A dompna·is taigneria
	50	grans viutatz d’onramen
		e de faitz carestia,
		tant cant ten son joven.
		vezer pot qand si mira,
		cum de beutat li vai ;
	55	pero si non cossira
		en valor, ill dechai,
		car sa beutatz s’en vai,
		et ill reman ab pel ferran
		dolenta, car a viscut tan
	60	ab plus simple sen d’un enfan.
VI		Lausengador, deserenan
		digatz so que·us er a talan,
		q’ieu no·i puosc aver pro ni dan.
VII		Enueios, mais ai de talan
	65	de trobar dompna ses enian
		qe vos de prez, cui amaz tan !