Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,016 Auteur: Giraut de Bornelh Genre: Canso Numero: XXV

Era, si·m fos en grat tengut

I	1	Era, si·m fos en grat tengut,
		Preir’eu ses glut
		Un chantaret prim e menut
		Qu’el mon non a
	5	Doctor que tan prim ni plus pla
		Lo prezes
		Ni melhs l’afines ;
		E qui·m crezes
		C’aissi chantes,
	10	Polira,
		Forbira
		Mo chan
		Ses afan
		Gran.
	15	Mas, a lor veiaire,
		Car no·n sabon gaire,
		Falh, car no l’esclaire
		D’aitan
		Que l’entendesson neis l’enfan.
II	20	E ja m’agra del tot vencut,
		Si Deus m’aiut,
		Ma bel’amia, mas del trut
		Levet la ma,
		Per que mos melher chans rema ;
	25	Que non es
		Bo c’om prezentes
		So que chamjes
		Ni pejures
		Per ira.
	30	Que ? Vira
		Talan,
		Qu’enganan
		Van
		Trich- e galiaire
	35	Gentil de bon aire !
		No volhatz retraire
		D’engan
		Vas celas que galiaran.
III		E pos aissi m’a retengut
	40	C’alhors no·m mut,
		Volha c’aia joi e salut ;
		C’aissi parra
		Si dic ver d’aisso don m’i va :
		Que, si·l bes
	45	C’aten no·m tarzes,
		Sol comenses,
		Eu pois ades
		Grazira,
		Servira
	50	Chantan
		E lauzan
		L’an
		Que·m fo comensaire
		D’esquivar maltraire.
	55	Tan sui fis amaire
		Qu’enan
		Vai m’amors ades esforsan.
IV		Pero ben ai lo tems agut
		Quez a perdut
	60	M’o tengra, s’agues tan volgut,
		Ni mes en va
		Mo chantar, mas aissi s’escha,
		Tro merces
		O melhur apres.
	65	E qui·m mostres
		Com m’en lonhes,
		Garira,
		Gandira
		Lonhan
	70	Esperan
		Man
		Deviro Belcaire ;
		Car no posc de laire
		Mo fat cor estraire
	75	Ni blan
		La perda que pris per lo gan.
V		Aissi m’es tot dessovengut
		Can ai vezut,
		Car sol m’apelet un jorn drut
	80	E, si m’estra
		So que·m dis, malestan será ;
		C’anc, pos pres
		Aguem que m’ames,
		No·n cut proes
	85	Qu’en re·m vires.
		Mentira ?
		Sofrira
		Pensan
		Sofertan,
	90	Can
		Me volc amors faire ;
		Mas, pel chap mo paire,
		No serai confraire
		Denhan
	95	D’amor que·m prenda de l’un pan.
VI		C’anc no·m plac amors per escut
		A cors batut
		D’un privat e d’altr’escondut !
		Mas qui·m volra,
	100	Tota l’aurai e tot m’aura.
		No dic ges,
		Ans que·l tot perdes,
		Non esperes ;
		Que drutz engres
	105	S’aïra,
		Sospira
		Cudan,
		Menassan
		Dan.
	110	Pero sofertaire
		Pren enans repaire
		Que glotz menassaire
		Cridan
		Cals colps faria de so bran.
VII	115	Fols es domneiaire,
		S’ab critz ni ab braire
		Vas se vol atraire
		Preian
		Bona domna ni benestan.