Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 238,001=106,011 Auteur: Guionet , Cadenet Genre: Tenso (Partimen) Numero: XXII

Cadenet, pro domna e gaia

I	1	Cadenet, pro domna e gaia
		pregan dui fin amador,
		e leis non platz que drut aia,
		per que l’us pert sa valor,
	5	qu’era pros, tan greus pensansa
		l’en ven, car no·n es jauzens.
		l’autr’en meillur’ et enansa,
		qu’era enans recrezens.
		digatz m’, al vostr’escien :
	10	quals ama plus finamen ?
II		Guionet, cel que s’esmaia
		tant q’en pert pretz e valor
		per leis qu’es pros e veraia,
		que no·l ten a servidor,
	15	ama meils, no·i ha doptansa :
		que sapchatz que·l pesamenz
		li tol tota la membransa
		de sos bels captenemens,
		que tant pliu·l cor e·l talen
	20	en amor c’oblida·l sen.
III		Cadenet, s’ieu vos dizia
		que conogut vos avetz,
		eu sai ben qu’eu failliria
		atressi cum vos failletz ;
	25	car, s’ieu quec jorn peiurava,
		doncs queria ieu son dan
		de midons, s’ieu la preiava.
		donc non ama sidons tan
		cel c’ades es plus savais
	30	com cel qui totz jorns val mais.
IV		Guionet, si retenia
		la bella cel qui pert pretz.
		en sa valor tornaria
		. . . . . . . . . . . . . . . . .
	35	. . . . . . . . . . . . . . . . .
		cel qu’es avols, tant ni quan,
		ja no·us cujetz que·ill menbrava
		de pretz plus qu’a un enfan ;
		e·l pros es fels quant s’irais,
	40	e si s’espert, no·n pot mais.
V		Cadenet, s’enaisi era,
		c’om fos per esser malvatz
		drutz, ja mais hom non penssera
		de ren, mais de malvestatz ;
	45	car qui non puingna que vailla
		mais qu’enans non a valgut
		sos pretz, cujatz que non failla
		domna, si·l reten per drut ?
		si fai, car non ama be,
	50	si per leis meils no·is capte.
VI		Guionet, ja no·n laissera
		son pretz lo pros ni·l prezatz ;
		ans sapchatz que meillurera ;
		mas del tot es oblidatz,
	55	si·l turmenta e·l trebailla
		Amors, que de so vengut
		li son tuit sei faig, ses failla,
		don el mais no·n a pogut,
		qu’om enamoratz no ve
	60	ni au ni enten fort be.