Appel, Carl. Zu Guillem Ademar, Grimoart Gausmar und Guillem Gasmar. Verhältnis dieser drei Trobadors zueinander. "Zeitschrift für romanische Philologie", 14 (1890), pp. 160-168.

Zenker, R., "Zu Guilhem Ademar, Eble d'Uisel und Cercalmon" > CdT: Observacions.

Code: 323,011 Auteur: Peire d'Alvernha Genre: Vers Numero: II

Cantarai d'aquestz trobadors

I	1	Cantarai d’aqestz trobadors
		que canton de maintas colors,
		e·l pieier cuida dir mout gen ;
		mas a cantar lor er aillors,
	5	qu’entrametre·n vei cen pastors,
		c’us non sap qe·is monta o·is dissen.
II		D’aisso mer mal Peire Rotgiers,
		per qe·is n’er encolpatz primiers,
		car chanta d’amor a presen ;
	10	e ualgra li mais us sautiers
		en la glieisa o·us candeliers
		tener ab gran candela arden.
III		E·l segonz Girautz de Borneill,
		qe sembla oire sec al soleill
	15	ab son chantar magre dolen,
		q’es chans de uieilla porta-seill,
		qe, si·s mirava en espeill,
		no·is prezaria un aiguilen.
IV		E·l tertz Bernartz de Ventedorn,
	20	q’es menre de Borneill un dorn,
		en son paire ac bon sirven
		per trair’ab arc manal d’alborn,
		e sa maire escalfava·l forn
		et amassava l’issermen.
V	25	E·l qartz de Briva·l lemozis,
		us ioglars q’es plus qerentis
		que sia tro c’en Benaven ;
		e semblaria·us pelegris
		malautes, qan chanta·l mesquis,
	30	c’a pauc pietatz no me·n pren.
VI		E’n Guillems de Ribas lo qins,
		q’es malvatz defors e dedins
		e ditz totz sos vers raucamen,
		per que es avols sos retins,
	35	c’atretan se·n faria us pins,
		e l’uoil semblan de vout d’argen.
VII		E·l seises Grimoartz Gaumars,
		q’es cavalliers e fai·s ioglars ;
		e perda dieu qui lo cossen
	40	ni·l dona vestirs vertz ni vars,
		qe tals er adobatz sem pars,
		q’enioglarit se·n seran cen.
VIII		Ab n’Arnaut Daniel son set,
		c’anc nuilla ren ben non chantet,
	45	e fai us motz c’om no·ls enten,
		c’anc, pois per soberna nadet
		ni la lebre ab lo bou casset,
		non valc sos chans un aiguilen.
IX		L’oites es Bernatz de Saissac,
	50	c’anc un sol bon mestier non ac
		mas d’anar menutz dons queren,
		et anc puois no·l prezem un brac,
		pois a’n Bertran de Cardaillac
		qis un vieill mantel suzolen.
X	55	E·l novens es en Raembautz,
		qe·is fai de son trobar trop bautz ;
		mas eu lo torni e nien,
		q’el non es alegres ni chautz ;
		per so pretz aitan los pipautz
	60	que vant las almosnas queren.
XI		E’n Ebles de Saigna·l dezes,
		a cui anc d’amor non venc bes,
		si tot se chanta de coiden ;
		us vilanetz enflatz plages,
	65	que dizen que per dos poies
		lai se loga e sai se ven.
XII		E l’onzes Gonzalgo Roitz,
		qe·is fai de son chant trop formitz,
		per q’en cavallaria·is feing ;
	70	et anc per lui non fo feritz
		bos colps, tant fort non fo garnitz,
		si doncs no·l trobet en fugen.
XIII		E·l dotzes us vieils lombartz
		qe clama sos vezins coartz
	75	et ill eis sent del espaven ;
		pero sonetz fai mout gaillartz
		ab motz vaires moinz e bastartz,
		e lui apell’om Cosseden.
XIV		Peire d’Alvernge a tal votz
	80	qe chanta desus e desotz,
		e lauza·is mout a tota gen ;
		pero maistres es de totz,
		ab c’un pauc esclarzis sos motz,
		c’a penas nuils hom los enten.
XV	85	Lo vers fo faitz als enflabotz
		a Puoich-vert tot iogan rizen.
		Zu Grunde liegen ADIN². Ortographie nach A.

 

Siehe:

Chantarai d'aquest trobadors

Chantarai d'aquels trobadors