Appel, Carl. Der Trobador Uc Brunec (oder Brunenc). "Abhandlungen Herrn prof. Dr. Adolf Tobler", Halle a. S.: Max Niemeyer, 1895, pp. 45-78.

Code: 450,002 Auteur: Uc Brunet Genre: Canso Numero: II

Ara·m nafron li sospir

I	1	Ara·m nafron li sospir
		d’amor, qu’ins al cor los sen,
		e si merces no y dissen
		per adoussar mon martir,
	5	mala vi son clar vizatge
		e·l belh semblan ab que·m pres
		silh que s’amistat me mes
		al cor ab un fuoc volatge.
II		Quant amors venc asallir
	10	mon cor al comensamen,
		me dis e·m fetz entenden
		qu’ab mi partria·l dezir ;
		ara vey qu’ay senhoratge
		dels mals e petit dels bes,
	15	qu’enaissi so a asses
		en son costumier usatge.
III		E doncx, e que·m volon dir
		siey huelh ? ni que·m van queren ?
		pus ma dolor non enten
	20	ni mos precx no vol auzir ;
		mout son messongier messatge
		li dous esguart que·m trames ;
		mas, per Crist, s’ieu o saubes,
		non lor obrira·l coratge.
IV	25	Qu’era no·n volon yssir
		per negun autre talen,
		ans, quan cug mon pessamen
		virar ves nulh autre albir,
		amors ab son poderatge
	30	vai enan sazir mon pes,
		e tolh me so qu’ai empres
		e torna·m al sieu viatge.
V		Qu’ilh sap tan gen aculhir
		ab son amoros prezen
	35	qu’om d’enan lo sieu cors gen
		no pot sos plazers partir ;
		al folh fai cuiar folhatge
		et al nesci nescies
		et al entenden apres
	40	fenh ab belhs digz son pessatge.
VI		Be·mdeuria sovenir
		so qu’elha·m dis en rizen :
		que nulhs hom ses ardimen
		non pot guaire conquerir.
	45	aquest motz me pres ostage
		al cor ab semblan cortes,
		per que·lh prec e·lh clam merces
		que m’adouz son cor salvatge.
VII		Quan sa gran beutat remir,
	50	tal ioy ai, no·m sai ni·m sen,
		qu’aissi·m va·l plazers plazen
		al cor ab doussor ferir.
		res tan no m’es d’agradatge ;
		tan quan lo ioys ab mi es,
	55	rey o duc cuit o marques
		valer o d’aussor paratge.