Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,017 Auteur: Giraut de Bornelh Genre: Canso Numero: XXX

Er' auziretz     Enchabalir chantars

I	1	Er’auziretz     Enchabalir chantars ;
		Qu’eu sui amics enchabalitz e pars !
		Auiatz ! e fon anc mais dicha
		Tan grans foli’en chantan ?
	5	Greu n’eschaparai ses dan ;
		S’ab leis m’aparei ni m’ec
		Cui sui plus liges que sers,
		Terra, tu com me sofers ?
II		Ai, tantas vetz     M’a trach nescis parlars
	10	Joi d’entrels mas, per qu’esdevenh liars,
		E·l cor, pos en re s’aficha
		Don s’alegr’a tan ni can,
		Volri’eu chantes gaban ;
		Qu’era tro que s’esperec,
	15	Tenia·l drech per envers,
		Tan er’en amar esmers !
III		E qu’en diretz,     Si l’esciens es rars
		E·l cor es leus, valra·m ja sobramars ?
		No ja, tan es alt’e richa
	20	Cela — c’als remanh’ab tan ! —
		Ja re laus no m’i valran,
		Com c’adesch, e c’o eissec,
		Mou mas chansos e mos vers
		Com fols de saber esters.
IV	25	Anc nuls esfretz     No·m fo valens ni chars,
		Tro que m’ac lonh de joi sobregabars,
		E pois dic c’Amors me tricha
		Per un petit de semblan
		E pert per so que no·m blan
	30	Leu parlar c’us dans m’en crec
		Que·m te pres plus greu qu’en fers
		Per te, bocha, que mal mers.
V		Qu’era no·m letz, Can me valgra preiars,
		Querre merce ? Si fai, que mos trobars,
	35	Pos tan s’es m’amors africha
		C’altra no volh ni·n deman,
		Clama·lh merce. Qui que·l chan
		Celeis, cudes : chauzit lec ! —
		Fols trascudatz e despers,
	40	Tot trobaras so que quers ?
VI		E·l be que·t fetz,     Si n’eras en foc ars,
		Potz li grazir ? — Fo donc mas us baizars !
		Fola res, e cel que picha
		No vai l’obra melhuran
	45	Cada pauc ? — Saber d’enfan !
		E si·t fetz mais que no·n dec,
		Peier que cilh de Bezers,
		Tu cals merces l’en refers ?
VII		Tals que lai dretz     Los olhs on bat la mars
	50	E·l cors es dolz e francs e fis e clars
		De celeis cui jois s’abricha
		Lonh d’avol pretz e d’engan
		E de me que vau pensan
		Tan qu’en magrezisc e sec
	55	Volven de tort en travers
		Plus abruzitz d’un convers.
VIII		E cudatz setz     M’enoi ni dejunars
		Ni·m tenba dan ? No fai, que·l dolz pensars
		M’aduri’ab una micha
	60	San e let al chap de l’an !
		Fols, c’as dich ? Pauc t’en creiran
		De so c’anc vers no parec !
		Si fara be, si l’enquers,
		Mos Linhaure lai part Lers.
IX	65	Joios, qui per bon enders
		No s’alegra, fols es mers !