Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,025 Auteur: Giraut de Bornelh Genre: Canso Numero: XXXII

Be conve, pos ja baissa·l ram

I	1	Be conve, pos ja baissa·l ram
		La folh’e·l fruchs apres las flors,
		Que d’un vers, en que·m sui tarzatz,
		M’esfortz com als primers l’egalh ;
	5	Qu’esters no m’er onors ni pretz,
		Pos locs m’en aiud’e gens tems,
		Si de tal manera no·l fatz
		Que contrapasse·ls plus prezatz.
II		E per ma guerrera cui am,
	10	Car es una de las melhors,
		Conve, si noca·m sui amatz,
		Que per l’aventura·m trebalh
		E m’en fenha conhdes e letz ?
		No fai, ans cut que n’ai dich nems,
	15	Pos leis non agrada ni·lh platz
		Qu’eu m’en deport ni·m n’assolatz.
III		E dobla·m del voler la fam,
		Per que s’esvertuda l’amors,
		Qu’era·n sui plus enamoratz
	20	De leis, sembla, que l’amiralh,
		Dic a vos, que non o sabetz ;
		Tan gentet s’avenon ensems
		Lo sens e·l pretz e la beltatz
		El franc cors c’anc bona fos natz !
IV	25	E si·m solh eu tener so clam
		Com vassal de lor bos senhors
		E no m’en sui del tot laissatz ;
		Que·l nescis cor ab que·m baralh,
		Fis contra leis e vas me quetz,
	30	Me ditz qu’ela·m fo vel’e rems
		De mans encombrers, c’ai passatz,
		En que·m fora dezesperatz.
V		Pero de chabrol o de dam,
		Si precs entendes ni clarmors,
	35	Cudera fos adomesgatz ;
		Mas vos, ma domna, non assalh
		Clams ni merces, car no vezetz
		Los mals qu’eu trac ni·ls planchs ni·ls gems
		Qu’eu fatz la noch, can sui colgatz,
	40	E·l jorn no posc estar en patz.
VI		E si per Deu, cui sotzestam,
		No·us platz que·m trespas la dolors,
		Que m’aucira, si no·m pensatz,
		Greu m’er e s’orgolhs no·us i falh,
	45	E pezara·m, si no sentetz
		Com es jois frevolitz e sems,
		Can de servizi no ve gratz
		Celui que·s n’es molt trebalhatz.
VII		E si·m tenetz pres el liam
	50	E no·m val forsa ni valors,
		No·m deu valer umilitatz ?
		Si fai, pos en re no trassalh
		Vostres maus ! E si·m destrenhetz
		Que mais me volgr’esser reems
	55	De Masmutz o de revelatz
		Qu’en tal trebalha fos liuratz !
VIII		Per vos, domna, que·m destrenhetz,
		Cuder’eu ben esser reems
		De Masmutz o de revelatz
	60	Ans c’aissi fos justiziatz !
IX		Domna, merce ! Car no pensatz
		Com eu no fos totztems forsatz ?