Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,058 Auteur: Giraut de Bornelh Genre: Canso Numero: XXXIII

Can creis la frescha folh' e·l rams

I	1	Can creis la frescha folh’e·l rams
		E l’ombra s’espeiss’eis defes,
		M’agrada l’aur’e·l tems e·l mes
		E·l  gaps e·l ris e·l jois e·l chans
	5	E·l  dolz mazans,
		Que creis, can s’azina·l matis,
		Si no·m gandis
		Mos-Senher convinens, e mans
		Fora m’enans
	10	Qu’eu fes un vers que fos per cels chantatz
		Cui pretz e jois e cortezia platz.
II		E no cuder’entre nos ams
		Mals ni meschaps ni tortz chaubes ;
		Mas s’eu te cre e tu no·m cres,
	15	Com te posc esser fis amans ?
		Meus es lo dans !
		Qu’eu fora frachs e francs e fis,
		Si·m consentis
		Que l’esperans’e·l bels semblans
	20	Me fos durans ;
		Mas a greu er vera fin’amistatz,
		Pos qu’i sofranh tota l’una meitatz.
III		E cudatz c’aisso sia clams
		Ni qu’eu m’en rancur ? No fatz ges !
	25	Tota ma rancur’es : ‚Merces !‘
		Si be·s passa·l dichs los garans,
		No·n sui clamans,
		Mas be volri’ela chauzis
		Que no·n falhis ;
	30	Tan es adrech’e benestans !
		Que·l maier pans
		Chaira del pretz, si no·l soste vertatz,
		Et er a greu fis cor enves dos latz.
IV		Ges leis non ateis lo liams
	35	En que cudei c’ams nos prezes.
		De me conois be que sui pres,
		C’ades par fis amics trians,
		Qu’eu cuder’ans
		Que s’aspra chaptenensa vis,
	40	C’us cals que ris
		M’aleuges mos maiors afans
		E·ls plus pezans !
		Mas desqu’eu vi que·l cor l’era chamjatz,
		Chamjera·l meu, s’aissi no fos fermatz.
V	45	E pos del mal no·m part la fams
		E conosc cals seria·l bes,
		Si no m’en part, falh ? — Tu no ges !
		E com ? — Ja semblari’engans
		Aitals balans
	50	C’om ben ames e no sofris ! —
		E tu ja dis
		Que·l mals aiuda·l be cen tans ? —
		Ja no soans
		So que plus vols ni t’en fenhas iratz ;
	55	Que guerra toi soven so c’adui patz.
VI		A, com ? Fo·n petitz lo reclams ?
		Qui tan prim non o conogues,
		Can li plac c’ab se·m retengues
		E·m soferc qu’eu li fos comans
	60	E·m det ses gans
		Sas mas, per que melhs m’enriquis,
		Tro pois m’aucis,
		Can me fo veiaire·l demans,
		C’us dels Bertrans
	65	Non es tan ferms ni tan ben ensenhatz
		C’ad aital pas no fos totz issaratz.
VII		E pois a que diras que m’ams,
		Si, can m’auras gran be promes,
		Me falhs e·m ditz qu’ eu sui mespres ?
	70	E que ? No·m doptas ni no·m blans ?
		No m’o desmans,
		Qu’eu no volri’om pros plevis
		So que mentis ;
		No·s tanh mas als trafas truans
	75	Fals e chamjans
		Que s’eu vos dic d’aisso, volh que·m crezatz:
		Per no-poder rema, si non o fatz !
VIII		E no volh esser corelhans,
		Per qu’eu bobans
	80	Pro vetz d’aisso don altre for’iratz ;
		Qu’en Sobre-Totz s’en es a me clamatz.
IX		D’un convinen que m’es tan deslonhatz
		Qu’eu neis m’en for’e mos Folha laissatz.