Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,028 Auteur: Giraut de Bornelh Genre: Canso Numero: XXXVIII

Car non ai

I	1	Car non ai
		Joi que m’aon,
		Me te de
		Chantar soven
	5	E, si m’enten
		En far chansos,
		No m’es pros ;
		C’aissi com solia
		No·i posc avenir,
	10	Ans m’en cut partir.
		E gierai m’en ?
		No per re !
		Qu’era·m sove
		Qui·m pres e si·m ris
	15	Fors de mo païs.
II		E dirai
		Qui es ni don ?
		Non eu, que
		Leugeramen
	20	Falh e mespren
		Qui·s fai janglos
		A sazos.
		Per que, s’eu dizia,
		Cui am e dezir
	25	Pert, si no consir ;
		C’ab falhimen
		S’estrai se
		Cilh cui quer be,
		Cui eu sui plus fis
	30	Qu’Elena Paris.
III		Mas no sai
		Com de preon
		M’aperte
		C’ai marrimen
	35	E de nien
		Fatz me gilos
		Enveios,
		Cais qu’eu conoistria
		Per sobras d’albir.
	40	Mas si Deus m’aïr,
		S’eu veramen
		Be no·n cre,
		Si no·m refre
		D’aisso que m’es vis
	45	Que dolz m’er vezis !
IV		Donc no·m vai
		Lo melhs del mon ?
		S’om no ve
		Contravalen
	50	Al seu cors gen,
		Ben es razos
		C’amoros
		E jauzions sia
		Cui denh’acolhir
	55	En grat so servir
		E cui consen
		Josta se,
		Ja, per ma fe,
		Melhs non er’assis !
	60	Fola res, que dis ?
V		Que ja·m fai
		Mal e confon.
		Deus, merce !
		Can fadamen
	65	Parlam soven,
		Si que·l manbos
		Ditz que tos !
		Com me confondria,
		Si·m fai esjauzir ?
	70	Ans li dei grazir
		Lo pensamen
		Que m’en ve,
		Ab que m’estre
		De so que l’ai quis,
	75	Que sols la servis.
VI		Era·m trai
		Vas mo segon
		Ad esple
		Tot mantenen
	80	E port prezen
		Al rei n’Anfos
		De mos sos ;
		C’altra manentia
		Non ai mas de dir
	85	Que l’aus perofrir.
		Car a valen
		E mante
		Pretz, me conve
		Qu’eu l’estei aclis
	90	Sers oltramaris.
VII		Razo s’enten,
		Si·l mante
		Vas sanh terre,
		Car trop mais conquis
	95	Sobre Sarrazis !