Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,057 Auteur: Giraut de Bornelh Genre: Canso Numero: XXXIX

Can brancha·l brondels e rama

I	1	Can brancha·l brondels e rama
		Per vergers e l’erba nais,
		M’es lo mati bel, can sona
		Lo rossinholetz els plais ;
	5	C’altressi·m n’esvelh ab ora
		Com el e·n torn bautz e gais,
		C’anc no fui tan apensatz
		Que l’estatz
		Mais no m’aiudes assatz
	10	Que·l tems dezassazonatz.
II		E can cest crid’e cel brama,
		L’us drech e l’altr’en biais,
		M’es aicela sazos bona ;
		Qu’entrels valens e·ls savais
	15	Sortz jois, per que tals s’amora
		C’anc en invern mal no·n trais.
		Qu’eu eis que m’er’estranhatz
		De solatz,
		No·m senti tan, pos fui natz,
	20	Com fatz er’, enamoratz.
III		C’ altressi m son’e·m reclama,
		Com fetz los bous Bertalais,
		Amors e re plus no·m dona,
		Per que·m fer al cor esglais.
	25	E si no·lh platz que m’acora,
		No·n posc mais sofrir lo fais ;
		C’us volers desmezuratz
		M’es doblatz
		Qu’er’am, si·m pez’o si·m platz,
	30	Tal don serai greu privatz.
IV		E pero res no m’afama
		Tan com s’amors ni no·m país ;
		Qu’el maltrach, que·m desazona,
		Magrezisc e pois engrais.
	35	E si saubes can ni cora
		N’aurai loc c’als precs m’eslais,
		Tot l’afan sofrir’en patz
		E sapchatz
		C’ab menhs m’en tengra paiatz
	40	Que vos no cudariatz.
V		C’obs es c’amics que ben ama
		Prenda·l menhs e ponh el mais,
		E mentr’enquer ni razona,
		Semblara fols, si·s n’irais ;
	45	C’avenir pot en tal ora
		Que·s n’an l’ir’, e venra·l jais
		E pels respechs c’a donatz
		Totz forsatz,
		Tenra leu entre sos bratz
	50	So don plus era cochatz.
VI		Cudatz vos, qui trop se clama,
		Que sos jois plus no n’abais,
		E qui gran tort no perdona,
		Que sia fis ni verais ?
	55	Ai, Deus ! s’eu no fos, qui fora,
		Can per drech nien m’estrais
		Celeis cui m’er’autreiatz ?
		E·l bos fatz
		C’avi’aissi m’es chamjatz
	60	C’anc pois no fui ben amatz.
VII		Era, si·m laiss’en la flama
		Cel’a cui mo cor m’atrais,
		Can passei vas Eschalona,
		De pro m’er cregutz l’esmais
	65	E no·m valran una mora
		Sonet ni voltas ni lais ;
		Ans me sui totz acordatz
		Que viatz
		Torn al mester dels letratz
	70	E·l chantars si’oblidatz !
VIII		Pero, domn’, ab que sofratz
		E volhatz
		Mos precs e que·ls m’acolhatz,
		Tost m’er coratges chamjatz !
IX	75	E vos, Tart-s’i-pres, sapchatz
		Qu’eu am, can vos guerreiatz !