Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,020 Auteur: Bernart de Ventadorn Genre: Canso Numero: XX

Gent estera que chantes     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

I	1	Gent estera que chantes,
		s’a Mon Conort abelis,
		mas eu no cre que·m grazis
		re que·lh disses ni·lh mandes,
	5	car trop n’ai faih lonc estatge
		de vezer lo seu cors gen
		avinen     e d’agradatge ;
		e lais m’en, si Deus be·m do,
		pel meu dan e pel seu pro ;
II	10	Mas fals lauzenger engres
		m’an lunhat de so päis,
		que tals s’en fai esdevis
		qu’eu cuideva que·ns celes
		si·ns saubes ams d’un coratge.
	15	e car me don espaven,
		vau queren     cubert viatge,
		per on vengues a lairo
		denan leis, ses mal resso ;
III		Car no parria, ames
	20	nulhs om que d’amor s’aizis,
		car per celar es om fis
		e·n estai de joi plus pres.
		donc, s’eu en pren bon uzatge,
		midons, c’a valor e sen,
	25	prec m’esmen     dins son ostatge
		l’afan, can veira sazo,
		e no i gart dreih ni razo.
IV		E si·l plazia, ·m tornes
		al seu onrat paradis,
	30	ja no·s cuit qu’eu m’en partis ;
		ans mor can no i son ades !
		Deus ! can aurai vassalatge
		que denan leis me prezen ?
		trop m’aten    en voupilhatge,
	35	car no sap, s’ai tort o no,
		per c’a dreih que·m ochaizo.
V		Domna, ·l genzer c’anc nasques
		e la melher qu’eu anc vis,
		mas jonchas estau aclis,
	40	a genolhos et en pes,
		el vostre franc senhoratge,
		e car me detz per prezen
		franchamen    un cortes gatge
		(mas no·us aus dire cal fo)
	45	c’adoutz me vostra preizo.
VI		Domna, vos am finamen,
		franchamen,     de bo coratge,
		e per vostr’ om me razo,
		qui·m demanda de cui so.