Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,022 Auteur: Marcabru Genre: Vers Numero: XXII

Emperaire, per mi mezeis

I	1	Emperaire, per mi mezeis,
		Sai quant vostra proeza creis,
		No·m sui jes tarzatz del venir,
		Que Jois vos pais e Pretz vos creis,
	5	E Jovens vos ten baud e freis
		Que fai vostra valor doucir.
II		Pois lo fills de Dieu vos somo
		Que·l vengetz del ling Farao,
		Ben vos en devetz esbaudir ;
	10	Contra·ls portz faillon li baro,
		Li plus de conduich e de do,
		E ja Dieus no·ls en lais jauzir !
III		Mais en cels de lai es remas
		Ad ops d'Espaigna e del vas,
	15	En devetz ben l'afan soffrir,
		E·ls Sarrazis tornar atras,
		E de l'aut orguoill forvenir,
		E Dieus er ab vos al fenir.
IV		Als Amoravis fai conort
	20	Per las poestatz d'outra·l port
		Qu'ant pres una tel' ad ordir
		De drap d'enveia e de tort,
		E ditz cadaüs qu'a sa mort
		S' fara de sa part desvestir.
V	25	Mas de lai n'ant blasme li ric
		C'amon lo sojorn e l'abric
		Mol jazer e soau dormir.
		E nos sai, segon lo prezic,
		Conquerrem de Dieu per afic
	30	L'onor e l’aver e·l merir.
VI		Trop s'en van entr'els cobeitan
		Aicill que vergoigna non an,
		E·s cuion ab l'aver cobrir ;
		Et ieu dic lor, segon semblan,
	35	Que·l cap derrier e·ls pes denan
		Los coven dels palaitz issir.
VII		Per pauc Marcabrus non trasaill
		De Joven, can per aver faill,
		E cel qui plus l'am' acuillir,
	40	Quan venra al derrier badaill,
		En mil marcs non dari' un aill,
		Si li fara la mortz pudir.
VIII		Ab la valor de Portegual
		E del rei Navar atretal
	45	Ab sol que Barsalona·s vir
		Ves Toleta l’emperial,
		Segur poirem cridar : reial !
		E paiana gen desconfir.
IX		Si non fosson tant gran li riu
	50	Als Amoravis for' esquiu ;
		E pogram lor o ben plevir,
		E s'atendon lo recaliu
		E de Castella·l seignoriu,
		Cordoa·il farem magrezir.
X	55	Mas Franssa Peitau e Beiriu
		Aclina un sol seignoriu,
		Venga sai Dieu son fieu servir !
XI		Qu'ieu non sai per que princes viu
		S'a Dieu no vai son fieu servir.