Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,032 Auteur: Marcabru Genre: Vers Numero: XXXII

Lo vers comenssa

I	1	Lo vers comenssa
		A son veil, sen antic;
		Segon l’entenssa
		De so qu'ieu vei e vic,
	5	N'ai sapienssa
		Don ieu anc no·m jauzic;
		Greu puosc abric
		Trobar ses malvolenssa,
		Mais en baro.
II	10	Tant creis durenssa
		C'alegr' en son li ric;
		Avols cossenssa
		Fai sobremontar tric;
		Sofren sofrenssa
	15	Esdevenon amic,
		Al ver afic,
		Segon la penedenssa
		N'auran perdo.
III		Non sai que faire,
	20	Tant fort sui entrepres,
		Qu'entorn l'araire
		Si fant villan cortes,
		E' il just pechaire
		De so qu'en lor non es.
	25	Si m'ajut fes,
		Tals mil en auzetz braire
		C’anc res non fo.
IV		Ges no m'esclaire,
		Ni o farai d'est mes,
	30	Ni o dei faire
		Pels fills que fant laides;
		Trop tem mal traire
		Per atendre sordeis;
		Mout nais espes
	35	Malvestatz de sa maire
		Senes razo.
V		Lo cors m'esglaia,
		Ja non o celarai,
		Amors veraia
	40	Trob'ar greu fina sai,
		Qu'en lieis non aia
		C'a falsedat retrai;
		Contra·l savai
		Es leu amors savaia
	45	E bon' al bo.
VI		Mout pretz m'en aia
		D'amor que no mesfai,
		Qu'es ver' e gaia
		Contra·l ver amic gai,
	50	Tant cant vol braia
		Lausengiers et abai,
		Qu'ieu sai on jai
		L'amors que no s'esmaia
		De lor sermo.
VII	55	Qui ses bauzia
		Vol Amor albergar,
		De cortesia
		Deu sa maion jonchar;
		Get fors feunia
	60	E fol sobreparlar;
		Pretz e donar
		Deu aver en bailia,
		Ses ochaio.
VIII		C’Amors s’embria
	65	Lai on conois son par.
		Blanch’ e floria
		E presta de granar,
		Ses fellonia
		Fai contr' amic ausar;
	70	Ops l'es que·is gar
		Cel cui bon' Amors guia,
		De mespreiso.
IX		Jovens someilla,
		Greu prendra mais revel,
	75	E par qu'espeilla
		Lo seignor Daucadel,
		Tot jorn conseilla
		Ab son dous caut morsel;
		Prop del tessel
	80	Malvestatz li pendeilla
		Al capairo.
X		Dolors m'esveilla
		De fresc e de novel,
		Cals meraveilla
	85	Que greu trob qui m'apel?
		Malvestatz treilla
		E Jois torn'en paissel,
		Al plus isnel
		Fer tal vetz lonc l'aureilla
	90	Qu'el non ditz no.
XI		D'aquest flagel
		Marcabrus si coreilla
		Ses compaigno.