Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,037 Auteur: Marcabru Genre: Vers Numero: XXXVII

Per savi·l tenc ses doptanssa

I	1	Per savi·l tenc ses doptanssa
		Cel qui de mon chant devina
		So que chascus motz declina,
		Si cum la razos despleia,
	5	Qu'ieu mezeis sui en erranssa
		D'esclarzir paraul’ escura.
II		Trobador, ab sen d'enfanssa,
		Movon als pros atahina,
		E tornon en disciplina
	10	So que veritatz autreia,
		E fant los motz, per esmanssa,
		Entrebeschatz de fraichura.
III		E meton en un' eganssa
		Falss' Amor encontra fina,
	15	Qu'ieu dic que d'Amar s'aizina
		Ab si mezesme guerreia;
		C’apres la borsa voianssa
		Fai fols captenenssa dura.
IV		Per so·n port ir' e pesanssa
	20	C’aug dir a la gen frairina
		C’Amors engan' e trahina
		Cellui cui Amars reneia;
		Menton, que lor benananssa
		Es Jois, Sofrirs e Mesura.
V	25	Aitals pareills fai mostranssa,
		S'en doas partz non camina,
		Pois bon'Amors n'es vezina,
		Ab dos desirs d'un' enveia
		Ab segurana fianssa
	30	Blanca cara ver' e pura.
VI		C'Amors a signifianssa
		De maracd' o de sardina,
		E[s] de Joi cim' e racina,
		C'ab veritat seignoreia,
	35	E sa poestatz sobranssa
		Sobre mouta creatura.
VII		Segon dich, faich e semblanssa,
		Es de veraia corina
		Car se promet e·s plevina,
	40	Ab sol que·l dos no sordeia,
		E qui vas lieis no s'enanssa
		Porta nom de follatura.
VIII		Sermonars ni predicanssa
		Non val un ou de gallina
	45	Vas cellui de qu'es frairina
		Follia de cor correia;
		Qu·ieu sai s'Amars es amanssa,
		Qu'a mains es fals' e tafura.
IX		Fols pos tot cant au romanssa;
	50	Non sec razo, mas bozina,
		Car s'Amors viu de rapina,
		Autrei c'Amors s'amoreia
		E que Costans es costanssa
		E fals usatges dreitura.
X	55	La defenida balanssa
		D'aquest vers e revolina
		Sobr'  un' avol gen canina
		Cui malvatz astres ombreia,
		C'ab folla cuida bobanssa
	60	Ses faich de bon aventura.
XI	DNa	La cuida per qu'el bobanssa
		Li sia malaventura.