Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,040 Auteur: Marcabru Genre: Vers Numero: XL

Pus mos coratges s'es clarzitz

I	1	Pus mos coratges s'es clarzitz
		Per selh Joy don ieu suy jauzens,
		E vey qu'Amors part e cauzis,
		Per qu'ieu n'esper estre manens,
	5	Ben dey tot mon chan esmerar,
		Qu'om re no mi puesca falsar,
		Que per pauc es hom desmentitz.
II		Aicel cui fin' Amors causitz
		Viu letz, cortes e sapiens,
	10	E selh cui refuda delis
		E met a totz destruzemens;
		Car qui fin' Amor vol blasmar
		Elha·l fai si en folh muzar
		Que per art cuid' esser peritz.
III	15	Cill son fals jutg'e raubador,
		Fals molherat e jurador,
		Fals home tenh e lauzengier,
		Lengua-loguat, creba-mostier,
		Et aissellas putas ardens
	20	Qui son d'autrui maritz cossens;
		Cyst auran guazanh ifernau.
IV		Homicidi e traïdor,
		Simoniaic, encantador,
		Luxurios e renovier,
	25	Que vivon d’enujos mestier,
		E cill que fan faitilhamens,
		E las faitileiras pudens
		Seran el fuec arden engau.
V		Ebriaic et escogossat,
	30	Fals preveire e fals abat,
		Falsas recluzas, fals reclus,
		Lai penaran, ditz Marcabrus,
		Que tuit li fals y an luec pres,
		Car fin' Amors o a promes,
	35	Lai er dols dels dezesperatz.
VI		Ai! fin' Amors, fons de bontat,
		C'a[s] tot lo mon illuminat,
		Merce ti clam, d'aquel grahus
		E·m defendas qu'ieu lai no mus;
	40	Qu'en totz luecx me tenh per ton pres,
		Per confortat en totas res,
		Per tu esper estre guidatz.
VII		Mon cor per aquest vers destrenh
		Quar mi plus que·ls autres reprenh,
	45	Que qui autrui vol encolpar
		Dregs es que si sap[c]ha guardar
		Que no sia dels crims techitz
		De que lieys encolpa e ditz,
		Pois poira segurs castiar.
VIII	50	Pero si es asatz cauzitz
		Sel que ben sap dire e·l ditz,
		Que pot si se vol remembrar.