Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 009,021 Auteur: Aimeric de Belenoi Genre: Sirventes (de réponse) Numero: -

Tant es d'amor honratz sos seignoratges

I	1	Tant es d’amor honratz sos seignoratges,
		que non i cap negus malvatz usatges ;
		e car n’Albertz es de dompnas salvatges,
		non taing, com fals remaigna entre lor ;
	5	qu’eu fui e son lo lur fizels messatges,
		et enansici lor pretz e lor valor,
		e non i trob ni destrics ni dampnatges,
		anz son onratz car chant per lor amor.
II		Ja mais n’Albertz non deu chantar d’amia,
	10	que renegat a tota cortesia ;
		e car dompnas apella de bauzia,
		be·l deuri’ hom pendre cum träidor ;
		e dic vos ben, si la forssa fos mia,
		ja noi agra nuill enemic pejor,
	15	c’om non es pros, si en dompna no·is fia,
		mas avols hom s’o ten a gran follor.
III		La lor amors es bona, e non greua,
		car si failli primieiramen na Eva,
		la Maire Dieu nos en fetz patz e treva,
	20	per que d’aisso nos non em pechador ;
		anz val ben tant totz hom c’ab ellas treva,
		que entrels bos lo ten hom per meillor.
		tals las lauza, non sap d’amor qe·is leva,
		per que no·is taing que n’aia mais dolor.
IV	25	E car mentau duquessa ni reina
		qe·ill fezesson de lor amor aizina,
		venques las en la pros comtessa fina
		de Proenssa, on a tota valor !
		De Salussa la bella n’Agnesina
	30	fassa est clam a son entendedor,
		la comtessa Biatritz, sa cosina,
		si·l ve camjar en nuill’ autra color !
V		Si·l Saluatga es tant pros d’Auramala
		cum n’Albertz ditz, non er mais dinz sa sala,
	35	que no s’o tenga ad anta et a tala ;
		e si ja mais ve lieis ni sa seror
		e no l’en fant tornar en un’escala,
		non son fillas d’en Colrat lor seignor,
		car cui ferra la lor amors sotz l’ala,
	40	aver en deu ardimen e paor.
VI		Pero si·l ve la pros dompna de Massa,
		cil que conquer totz iorns pretz et amassa,
		e no·l bat tant entro qe·n sia lassa,
		ja no·il sal Dieus son leial amador,
	45	ni non sia lonc temps fresca ni grassa
		ni non teigna son amic en pascor,
		car es lo jois que tot autre joi passa
		d’aqest segle et ab mais de doussor.
VII		Per las autras e per la pro comtessa
	50	del Carret vuoill que sia seignoressa
		d’en Albertet una vieilla sotzmessa
		d’avol home, car a dich mal de lor.
		e . . . . . . dompna e mal no·l pessa,
		d’entre las pros s’en an estar aillor,
	55	car ges no·is taing que neguna l’aguessa
		prestat d’invern son avol cobertor.
VIII		Dompnas, totas li faitz don e promessa
		de tot son mal, car a dich mal d’amor.

 

S. En amor trob tant de mal seignoratge.