Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,009 Auteur: Uc de Sant Circ Genre: Canso Numero: III

Dels huoills e del cor e de me

I	1	Dels huoills e del cor e de me
		Ai eu mezeis pechat trop gran,
		Car eu celliei qe mon cor te
		Non vei e muor sai desiran
	5	E·l cor plangen e·ls huoils ploran ;
		Car s’ill autre ben no·m fazia,
		Sivals lo jorn que eu podia
		Son bel cors gai plazen vezer,
		No·m podia mais dan tener.
II	10	Per q’es fols qui en amor cre
		Son sen, ni ren fai qe·il coman,
		Q’ieu lo crezei, per qe·m n’ave
		A marrir plaignen sospiran ;
		Qe·l sens volc que m’anes loignan
	15	De mi donz, don teing a foillia
		Totz faitz que joi d’amor desvia,
		E teing a sen et a saber
		Tot so que jois m’en fai voler.
III		Chascus hom que son gen cors ve
	20	L’ama e la dopta e la blan,
		Et eu mais, qe·l cor e la fe
		Hi ai mes e tot mon talan ;
		Que sa clara beutatz resplan,
		E sa humils plazens paria
	25	E·l solatz e la cortesia
		La fant honrar e car tener
		Als pros, e grazir e temer.
IV		Tant val que, si tot no·m fai be,
		Ja·l cor ni mos precs ni mon chan
	30	No·n partrai, e c’ades merce
		No·il qieira humilmen merceian ;
		Q’ieu sai q’onrat mi son li dan,
		Car qui per rics pretz s’estudia,
		L’esforssamens, si be·is fadia,
	35	N’es gens ; per q’ieu no·n vuoill mover
		Lo cor ni·ls precs ni·l bon esper.
V		Anz l’am e l’amarai jasse ;
		Qecs jorns mi sembla plus d’un an
		Car non la vei, e no·m rete
	40	Nuills faitz on eu fassa engan,
		Anz cre far son pro e·l mieu dan.
		Ai las, en tant avinen guia
		Ai essaiat si ja poiria
		S’amor ni son grat retener
	45	Ni cum poirai far son plazer.
VI		Pros Comtessa de Monferran
		Mas mans jointas, on que sia,
		Soplei vas vostra seignoria,
		E creissi a tot mon poder
	50	La valor que vos fai valer.