Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,016 Auteur: Uc de Sant Circ Genre: Canso Numero: IV

Gent ant saubut miei uoill vensser mon cor

I	1	Gent ant saubut miei uoill vensser mon cor,
		Et jen miei huoill e·l cors an vencut me,
		Qe mos cors vi els huoills cella per que
		Moront miei huoill, et ieu e·l cors en mor ;
	5	E·l cors mieitz mortz — gardatz s’es ben trahire—
		Fai me a lieis que lui auci aucire
		De pessamem d’envej’ e de cossir,
		E·ls huoills de dol e si eis de desir.
II		Si·m plor ni·m plaing ni men duoill e mon cor.
	10	Ni n’ai desir, no m’en plaign’ hom de re,
		Car ben conosc que per lo mal que ve
		De tant ric luoc que negus hom non mor ;
		E puosc ben dir que ric son miei cossire,
		E si ja·m puosc enardir que·l desire
	15	Q’ieu ai de lieis li mostre ni·l aus dir,
		Onratz serai neus si·m fazia aucir.
III		Maintas sazos m’o acort e mon cor
		Cum ieu la prec, mas enaissi m’ave :
		Qan cuia·l cors parlar, la bocha·l te,
	20	E·l desirs creis et mos ardimens mor,
		E doblon me l’esglai e·il lonc sospire
		E fail me·l sens tant q’ieu non sai que dire,
		C’a lieis preiar non puosc endevenir,
		Ni comensar non o sai ni giquir.
IV	25	E s’ieu m’en loing, plus m’estai pres del cor,
		E on ieu plus li fuig, plus mi rete,
		Per qu’ieu del tot remanh en sa merce ;
		Car non mor gen aicel que fugen mor.
		Mas ges no·m par, qan son gen cors remire,
	30	Qez ilh deia mi ni autrui aucire,
		Anz m’es semblan qez ilh deia garir
		Aisso que fai tot autra mortz morir.
V		Anz q’ieu la vis, la conuc e mon cor
		E aic en li m’esperanssa e ma fe,
	35	E qan la vi, fui aissi sieus desse,
		Que per lieis val mos cors e viu e mor ;
		E·il sui quec jorn aissi fizels servire
		E de sos bes enanssaire e grazire,
		C’a cels q’adoncs l’avion en azir
	40	La fatz aras enanssar e grazir.
VI		Ja no·us cuidetz, Desirs, q’ieu vos adire
		Ni·m sia greu car vos sui francs servire
		Sez guizerdon, car cill c’ara desir
		Vos mi fa·l tort que m’aviatz fenir.