Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,038 Auteur: Uc de Sant Circ Genre: Sirventes Numero: XIX

Tant es de paubra acoindansa

I	1	Tant es de paubra acoindansa
		E de chaitiva semblansa
		Lo Maifres
		Lanssa c’om clama marques,
	5	Que qui·l ve pert benanansa
		E cobra enui e pesansa,
		Quar non es
		El seu cors neguna res
		Don hom aia esperansa
	10	Que·n traga nulla alegransa,
		E sa fes
		Non es ferma ses fermansa.
II		Mal acoill e parla e sona
		E mal manja e beu e dona
	15	E mal viu
		E fai croi senblan chaitiu,
		Et ab neguna gent bona
		No s’atrai ni no s’adona,
		Et esquiu
	20	Lo trobaretz e pensiu ;
		E cel que ve sa persona
		E la garda e la faissona,
		Ni s’ i pliu,
		Tot son afar desazona.
III	25	Sa gens vai descausa e nuda
		Mal abeurada e paguda
		Sospiran
		E Dieu e lui renegan ;
		Et en sa cort descazuda
	30	Non trob’om solatz ni bruda ;
		Joi ni chan
		No·i veirez ni bel semblan
		Ni socors ni bell’ ajuda,
		Et el estai longa muda
	35	En penssan
		Ab cor cau, flac com cocuda.
IV		Ab nuilla bona compaingna
		No s’atrai ni s’acompaingna ;
		Rofians
	40	I trobaretz e putans,
		Car ges de lor non s’estraingna
		Ni l’es lor paria estraingna.
		De mals grans
		Non pot issir mai bos pans,
	45	E fai malvaza gazaingna
		Cel que s’amistat gazaingna :
		Vils e vans
		Es e de croia bargaingna.
V		Milanes feiron folatge
	50	E lor anta e lor damnatge
		Que de lor
		Anc volgren faire seingnor
		Home de chaitiu coratge ;
		Be mal sembla de parage,
	55	Que l’amor
		No vol aver ni onor,
		Ni bels ditz ni bel estage
		No·ill donon nuill alegrage
		Ni dousor,
	60	Anz li son fer e salvage.