De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Còdi: 457,022 Autor: Uc de Sant Circ Genre: Deux coblas avec tornada Numero: LXXXV

Na Maria de Mons’es plasentera

I	1	Na Maria de Mons’es plasentera,
		Francha et humil e d’avinen senblansa,
		E fa onor et acuoill volontera
		Los bos e lor mostra bell’acoindansa,
	5	E sos cors es joves e bels e bos,
		Eill dich eill faich eill senblan amoros;
		Per que li voill de ben dir far honransa.
II		E, pois Dieus l’a mes en aital carera
		Q’en sa valor avem tuich esperansa,
	10	Prec la qe port tan dreita sa seingnera
		Q’a sos amics non don dol ni pezansa;
		Qe, pos vira ni chai nuill gonfanos,
		No tem hom pois lui ni sos conpaingnos,
		Eill enemic donon s’en alegransa.
III	15	Na Maria, vejatz ab quals rasos
		Ni ab qual sen se fai amar als bos
		Na Donela, nis fai creisser s’onransa.