Anglade, Joseph. Poésies du troubadour Peire Raimon de Toulose . Toulouse: E. Privat, 1920

Còdi: 355,004 Autor: Peire Raimon de Tolosa Genre: Sirventes Numero: [III]

 Era pus hyverns franh los brotz

I	1	Era pus hyverns franh los brotz
		E pareysson florit li ram,
		E·l gibres e·l neus son a floxs
		Pels termes e pels playssadencx,
	5	Be·s tanh [doncs I] qu'ieu me lueng d'enueg.
		Chantan e no pareys ges pecx,
		Sitot s'es braus et enuios lo temps,
		Pus d'aitals digz sai far chanso ni vers.
II		Ben sai parelhar e far motz
	10	Plas e clars, d'un semblan d'estam;
		Mas que val? qu'eras non es locx,
		E·l tersols mal auzats ramencx
		Be sai que son de bon art vueg,
		De trics qu'an afilatz lurs becx;
	15	E·l pros cortes [adreg I] fan plors e gems,
		Quar pretz e mortz e cazuts en evers.
III		Jurar vos puesc per Santa Crotz
		Qu'un non vey que pretz entier am,
		Que d'avareza·ls art lo focx;
	20	E tug lor fait son de fadencx,
		E mant hom pert lo gran e·l glueg;
		Doncx per que·s fai quecx sorts ni secz
		Pel mal [astre I] que los te vuetz e sems
		De tots bos ayps don elh van ras e ters?
IV	25	Ah! Malvestatz, non prendas totz
		Los ricx baros en ton liam,
		Ni Malespina ges non tocx
		Per ren, qu'ans t'es ben mielhs que·t trencx,
		Qu'a totz jors vuelh que sos bes pueg.
	30	E doncs, Valors, ja no l'abnecz.
		Quar ieu aug dir que totz bos faitz essems
		Renhon ab lui, per qu'es bes si·ls sufers.
V		D'aver la bella suy tan glotz
		Cui pessan dezir, don ai fam,
	35	Que no·m platz tan nul autre jocx;
		Ni no vuelh aver Foys ni Brencx,
		Si·lh platz que no·m meta en refueg
		Tan cum lies; e si mos fis precx
		No·m val, mal fas, Amors, quar aissi·m prems,
	40	Que fis amans adreitz sui totz convers.
VI		E pos tan fort mas nien consecs,
		Be·m deurias far un ben calque temps
		Entre .C. mals, que del dan tu·m malmers.