Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,006 Autor: Guilhem Ademar Genre: Canso Numero: I

 El temps d'estiu, qan par la flors el bruoill

I	1	El temps d'estiu, qan par la flors el bruoill
		E son braidiu li auzellet d'orguoill,
		Ai pessamen d'amor qe·m desacuoill;
		Que nuilla ren tant non desir ni vuoill.
	5	Ai! Douss'amia!
		Mala·us viron miei huoill,
		Si chausimens no'us guia.
II		Vejaire m'es q'ieu non sui cel que suoill:
		Si m'a sospres us grans mals don mi duoill
	10	Don ieu morrai, si la dolor no·m tuoill
		Ab un doutz bais dinz cambra o sotz fuoill.
		Ai! Douss'amia!
		Mala·us viron miei huoill,
		Si chausimens no·us guia.
III	15	Membre·us, dompna, qan mi detz seignoriu:
		« De vos servir m'autrei tant cum ieu viu! » -
		Tortz es per o, c'anc re no'us o forfiu.
		Ja no'm poscant dan tener enemiu!
		Ai! Douss' amia!
	20	C'a son coral amiu
		Non deu hom far ganchia.
IV		Neguna res no m'es tant fort esqiu
		Cum es d'amor e lausengier badiu,
		C'aia poder que menta so que pliu;
	25	Mas fos verais e tenga so que diu!
		Ai! Douss'amia!
		C'a son coral amiu
		Non deu hom far ganchia.
V		Eu ai ja vist home que conois fort
	30	Et a legit nigromanci'e sort
		Trazit per femn'a pechat et a tort;
		Et ieu, lasset! no m'en teing per estort.
		Ai! Douss'amia!
		Guidatz m'en a bon port,
	35	Si Dieus vos benehia!
VI		Jamais non vuoill chant ni ris ni deport,
		S'eras no'm fai la bell'a si acort.
		Pres n'ai lo mal don cre q'aurai la mort,
		Si'n breu de temps no'm fai de qe·m conort.
	40	Ai! Douss'amia!
		Guidatz m'en a bon port,
		Si Dieus vos benehia!