Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,001 Autor: Guilhem Ademar Genre: Canso Numero: II

Ben for'oimais sazos e lacs

I	1	Ben for' oimais sazos e locs
		Que m'aizines d'un vers, pensan
		Cum lo retraisses en chantan
		Tal per qe·m fos digz us vers «ocs»
	5	De celliei q'el mon plus desir,
		Don desiran m'er a languir,
		Si·n breu no·ill en pren chausimens.
II		E fara·m canudir a flocs,
		Si no·m socor abans d'un an;
	10	Que ja·m ditz hom qe·m vant broillan
		Canetas, e no·m sembla jocs.
		E si·m fai joven canuzir,
		Tot canut m'aura qan que tir;
		Que bons esfortz malastre vens.
III	15	E s'era tant blancs cum Enocs,
		Ad aiso no'm tenri'a dan
		A lieis servir de bon talan.
		Cum maier es, plus art lo focs;
		Atressi, cum ieu mais d'albir
	20	N'ai, ab mi, plus fort en cossir
		De dir e de far sos talens.
IV		C'aissi cum dels eschacs lo rocs
		Val mais qe·ill autre joc no fan
		E·l fins maracdes que resplan
	25	Mais que veires vermeils ni grocs,
		Aissi val mais - qui qe·is n'azir -
		Midonz d'altras per enriquir
		Son pretz ab sos chaptenemens.
V		Per' q'ieu volria esser cocs
	30	De sa cozina lieis gardan
		Anz que l'aver d'un amiran
		Ses sa vist' - e fos mieus Marrocs!
		Que non es hom que la remir
		De bon cor, ja·l puosca venir
	35	Lo j orn mals ni destorbamens.
VI		Per qe·t prec, messatgiers, que brocs
		Tant cant poiras ton alferan,
		E dic t'o, plus que per ton dan,
		Per mon destric, que no·t derrocs,
	40	Que tant tem, tro torns, ton delir.
		Q'un' autra sazon del morir
		Non seria eu tant dolens.
VII		E garda·t non semblar badocs
		Dels salutz ni de l'als q'ie·il man;
	45	Q'ieu pliu, si re·i vas cambïan,
		C'az un estrieup t'aura ops crocs.
		E di li·m que non puosc garir,
		Si·m fai tremolar e fremir
		Ses lieis ma voluntatz valens.
VIII	50	E pos l'aitan dir al partir
		Que Guillems Ademars fai dir
		Que sidonz val d'autras cine cens.
IX		E tu, Capairo, potz plevir
		C'aissi·m son fresc tug mei dezir
	55	Que sembla·m c'ades o comens.