Anglade, Joseph. Poésies du troubadour Peire Raimon de Toulose . Toulouse: E. Privat, 1920

Còdi: 355,018 Autor: Peire Raimon de Tolosa Genre: Canso Numero: [XVI]

Totztemps auch dir q'us jois un autre adutz

I	1	Totztemps auch dir q'us jois un autre adutz,
		Per que non voill nuill temps de joi partir,
		Q'ab joi fui natz et ab joi, on qe·m vir,
		Soi et serai, q'aissi·m soi captengutz;
	5	E si·l fin joi de lei en cui enten.
		Q'eu plus aten,
		Pogues aver, ben fora plus joios;
		Que dobles jois es rix e cabalos
		E qi joi sec jois li ve ses doptansa.
II	10	Per q'eu me soi autrejatz e rendutz
		A fin'Amor et a lei cui desir,
		Que finamen m'an fach mi oill chausir
		La bella q'es flors e mirailz e lutz
		E caps e guitz de tot ensegnamen;
	15	E pos tan gen
		Nafret mon cors d'un esgart amoros,
		D'al no·m soven ni no·m fo saboros
		Nuilz altre bes ni d'al non ac membransa.
III		Bona domna, vostre rix pretz saubutz
	20	E la faissos e·ill plazen acuoillir
		E la bocha don tan gen vos vei rir
		M'an tan sobrat qe soven deveing mutz
		E la on cuch gent parlar pert lo sen;
		Q'ab espaven
	25	Qer hom ric do, per qu'eu soi temoros;
		Mas eu auch dir q'hom savis, a razos,
		Conqer mainz bes sofren ab esperansa.
IV		De vos amar non serai recrezutz,
		Anz m'abelis mil tanz qu'eu non sai dir;
	30	Et si·us plagues c'o volguessetz sofrir
		Q'eu vos ames, ja non fora vencutz
		De vos servir mos fis cors leialmen;
		Anz m'er parven
		Q'engals sia l'afanz de nos amdos;
	35	Et er merces, si de tan m'es faitz dos,
		Qe mos volers no·s fraing ni no·s balansa.
V		Mas fis amanz no·s taing qe leve brug,
		Ans deu son cor celar et escondir,
		E·l ben e·l mal qi·ll ve d'amor grazir;
	40	Q'ab certes aibs es hom per pro tengutz;
		E qe·s gart be de far tot faillimen
		Ab escien,
		Qe de bon luoc ave bos guierdos;
		Qe si domneis e cortejars non fos,
	45	Non fora pretz ni servirs ni honransa.
VI		Domna, per so·m sui a vos atendutz
		Qe·m detz conseil, q'a pauc no·m fan morir
		La fin'amors q'eus ai e·ill greu sospir;
		E si mos cors fos per vos conogutz,
	50	Be m'es semblan que n'agratz hausimen,
		Qe no consen
		Nuill'altr'amor, ni ma bona razos
		No·m pot sebrar ni delonhar de vos,
		Tan m'es el cor vostra gaia semblansa.
VII	55	Pretz e valor, beltat, joi et joven
		Ses faillimen
		E toz bos aibs, totas belas faissos
		Ha Na Beatritz d'Est, q'anc non er e fos
		Don'ab tant bes ses tota malestansa.