Anglade, Joseph. Poésies du troubadour Peire Raimon de Toulose . Toulouse: E. Privat, 1920

Còdi: 084,001 Autor: Bertran de Gordo , Peire Raimon de Tolosa Genre: Tenso Numero: [XVII]

Totz tos afars es nienz

I	1	Totz tos afars es nienz,
		Peir Raimonz, e·l sens frairis;
		E non val dos anjevis
		Tots sabers mest bonas genz;
	5	E tenc per desconolscenz
		Qi be ni honor ti fai;
		Et sapchas qu'ieu non darai
		Per nuil mestier qu'en tu sia,
		Mais qar venguist per mi sai.
II	10	Seigner, flacs e recrezens
		Estatz mest vostres vezis,
		E sofranh vos pans e vis
		E fail vos aurs et argens;
		E·l meus mestiers es valenz
	15	Si·l vostre dig son savai;
		E s'ieti ja ren de vos hai,
		Jamai en home qi sia
		A mon jor no faillirai.
III		Peire, mal m'avondet senz,
	20	Qar de tenzo vos comis;
		Qe·l vostre mestiers es fis
		E vos etz bons e plazentz;
		E·l vostre arezamentz
		Es grans e·il chantar son gai;
	25	E negus joglars non vai
		Qe plus tard fezes follia
		Ni plus tost fezes bon plai.
IV		Tant es larcx e conoissenz
		Qe tot l'aver de Paris
	30	Darias en dos matis;
		E plai vos Jois e Joventz,
		Seigner; e·l vostre ardimentz
		Es grantz on faitz maint assai;
		E plus franc de vos non sai,
	35	E s'ieu mal dig vos avia,
		Tot sabchon qe mentit n'ai.
V		Vejas del tafur dolentz
		Qe·s cuidet q'eu l'esqarnis
		E qe·il lauzes e·l grazis
	40	Sos malvais captenemenz;
		E s'anc li passet las dentz
		Bos motz, a negun jor mai
		Ja cella que am no·m bai;
		E si·m dis mal per feunia,
	45	Perdon lo, qar s'en estrai.
VI		Chaitivez'e marrimenz
		Es tot l'an en vos assis;
		E qi·l vostre fag resis
		Mentar e·ls envelzimentz,
	50	Ben par com es conoiscentz,
		Ni qi·us honra qe·l mechai;
		Qe·us onrei tant qe·m desplai,
		Et on plus vos honraria,
		Adoncs i perdria mai.