Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,008 Autor: Guilhem Ademar Genre: Canso Numero: V

 Lanquan vei flurir l'espigua

I	1	Lanquan vei flurir l'espigua
		E s'azombra·l vitz e·ill vaisa
		E flors e fueilla s'afaisa
		E l'auzels ab sa par chanta,
	5	Be·m degr'amors jauzir hueimais,
		Mos l'alauza·n fai col e cais.
II		Si·s fara, mas trop m'o trigua
		Cela don mos cors no·s laisa
		Ni vas autra no·s bïaisa;
	10	Pero pueis n'ai vista manta
		Que·m fora grans honors lor plais,
		E n'agr'en meins d'un mes trop mais.
III		E vos no·m siatz enigua!
		Que gras cavals, quan s'eslaisa,
	15	Tira be·l fre e l'acaisa,
		Per que bos vasals crebanta;
		E pueis si·l pren uns be sa vais,
		Qui·l te lag e·n fai grans essais.
IV		Don - si Dieus mi benezigua! -
	20	La nueg entre sons pantaisa
		Mos cors, ab midons s'apaisa
		En durmen; mas pueis s'avanta,
		E quan reisit, es cortz lo jais
		Vas lieis qu'es lonh, so don m'irais.
V	25	Donx que n'er, ma douss'amigua?
		Mor pos consiriers no·m laisa
		De vos, per c'ai la crinh saisa,
		Corn s'avia d'ans caranta.
	30	Per Dieu, sostencsetz me lo fais!
		Mas vueill murir c'az autra·m lais.
VI		Laisar! Car? Aco non miga!
		C'anc trencatz no fo ab aisa
		Ni en forest ni en plaisa
		Ni en verdïer c'om planta;
	35	Ans es fin'amors c'anc no frais
		Que'm pauzet el cor ab un bais.
VII		Re no sai als que·us me digua
		C'ades sojorn'ez engraisa,
		Ez ieu, que·m trebaill e·m raisa,
	40	Morrai totz de dol e d'anta.
		Qu'ieu sai que soi aisel que pais
		Muzan las trufas de Roais.
VIII		E s'aisso no·us atalanta
		Que l'ira sobrevença·l jais,
	45	D'Albi sai que [e]la·s pertrais:
IX		Narbona, cui es pretz verais,
		Prec que·m mantenha, c'Albi lais!