Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,011 Autor: Guilhem Ademar Genre: Canso Numero: IX

 Quan la bruna biza branda

 

I	1	Quan la bruna biza branda
		De la forest fraysses e faus
		E secha·l joncx e·l glais e·l raus
		E l'alauzet'en la landa
	5	A son dous chantar retengut,
		Adoncx ai ieu lo mieu cregut;
		Qu'ar suy mais que no suelh prezans
		E·m vai mielhs que no sol dos tans.
II		Que tals mi tramet e·m manda
	10	Salutz ez amistatz coraus
		Dont ieu no sai tan dir de laus,
		Sa valor[s] no fos plus granda.
		Ben ai proat e conogut
		Del sieu cors gent, aperceubut
	15	Que non a par de belhs semblans
		En tot lo mon, si ben s'es grans.
III		Per so m'escalf'e m'abranda
		Sa fin[a] amistatz coraus.
		Quan non la vey, no fi ni paus,
	20	Qu'ans ses orguelh e ses guanda
		Vauc ves lieys a for d' esperdut;
		E des que la vey, no·m remut
		Tro qu'es denan mi trespassans.
		Pueyssas, on plus puesc, lai m'enans.
IV	25	Dieus li fes richa comanda
		Lo jorn que·l comandet las claus
		De lai on es [totz] pretz chabaus,
		E volc qu'en mout[z] luecx l'espanda.
		Si fa ylh be, si Dieus m'ajut!
	30	Ez ieu, si tan no fos crezut,
		Fauc [o] creire als plus duptans
		Ez als plus parlier[s] plaideyans.
V		Elh'eysx, Dieus, que·l mon guaranda,
		La fetz, e fou ricx lo jornaus;
	35	E quan l'ac facha, dis: «aitaus
		Vuelh que la serv'e la b[l]anda
		Totz temps, e per ren no[n o] mut! »
		- De me o dis, ben es sauput.
		Per que, si·lh servia mil ans,
	40	Lo maltrag[z] no·m seri'afans.
VI		Ben leu manhta gens truanda
		Dizon - quar no sabon ren aus,
		Quar es fina e naturaus -
		Qu'aisso dic de na Bertranda.
	45	Mas no·n an tan cum ieu vegut,
		Ni no lai son tan luenh avut.
		Qui qu'ela·s volgues fos Bertrans,
		Sol qu'ieu fos rics de ric[s] aimans!
VII		Egual si semblon a randa;
	50	Una de lieys par[s] ni eguaus? -
		Quo fai l'aiglos de coa·l paus
		Ni del cap lombecs miranda.
		Ez ieu ses lans'e ses escut
		Rendria·n tot home vencut
	55	Que d'aisso m'estes contrastans,
		Guarnit del tot non fos menhs guans.
VIII		Narbona, on qu'ieu si'anans,
		Narbona, on qu'ieu si'anans.