Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 281,006 Autor: Guilhem Ademar Genre: Canso Numero: X

 Mout chantera de joi e voluntiers

I	1	Mout chantera de joi e voluntiers
		Un leu sonet per dar m'esbaudimen,
		S'ieu conogues que chans ni alegriers
		Mi pogues dar al cor alegramen.
	5	Cusanssa es, e totz temps l'aug retraire,
		Que s'alegron tuich li fin amador,
		Qe·l jois d'amor es tant bos e tant fis
		C'om non a ben mas cel q'es fis amaire.
II		Mas mi auci l'amoros desiriers
	10	Qe·m ten et a·m tengut mout longamen;
		C'ab bels semblans et ab digz plazentiers
		Mi mes al cor lo fuoc d'amor arden
		La plus bella qez anc nasques de maire.
		Perqu'eu mi teing lo trebaill ad honor,
	15	Et on plus art, cum l'aurs deveing plus fis
		Envers amor qe·m fai ir'e maltraire.
III		E fora·m meills fos aillors mos penssiers,
		Don ieu agues calacom jauzimen,
		Car jes de lai on es mos cossiriers
	20	Non aten ieu mas ir'e pessamen.
		S'aurai aitant - car ill es la bellaire -
		C'us bos espers m'adoussa ma dolor,
		Qe·m promet joi: c'ab merce - so m'es vis -
		Deu ben amor trobar francs mercejaire.
IV	25	Gais cors adreitz, gens, francs e vertadiers,
		Per Dieu! Aiatz ves mi bon chausimen!
		Que cum la naus que mena lo tempiers,
		Que sobre·l mar sofre pen'e tormen
		Ni a conseill si non Dieu q' es Guidaire,
	30	Sui eu en gran perill per vostr'amor;
		E vos, dompna, ves cui estau aclis,
		Traitz m'a bon port, si cum etz de bon aire!
V		Si bels lauzars mi fos pros ni mestiers
		Ves ma dompna, be·n agra bon talen;
	35	Mas hom non pot dire - tant es sobriers -
		Lo sieu ric pretz fin e car e valen.
		Que Natura, que tant gen la saup faire,
		Qan la formet plus bella e meillor,
		Totz los bos aips del mon en lieis assis;
	40	Perq'ad autra mos cors no·is pot atraire.
VI		Mas a mos ops fo mals lo jorns primiers
		Q'ieu vi la bell'ab la cara rizen,
		C'anc pois non fui de mos huoills parsoniers
		Ni de mon cor, c'ades mi vant fugen.
	45	C'ab lieis ant pres lor luoc e lor repaire,
		E vas mi son fellon e traïdor;
		Que no·m dizon de lieis ni joc ni ris
		Ni novellas don ja mos cors s'esclaire.
VII		Domidieu prec, q'es verais chapdellaire,
	50	Seign'en Monal, qu'El vos cresca honor
		E·us don vencer totz vostres enemis
		E cobrar l'er q'ac lo coms vostre paire.
VIII		Seign'en Monal, non cre que tarze gaire
		Que eu veirai en Raimon mon seignor,
	55	Que longamen n'ai estat, so m'es vis;
		Q'el es de Pretz capdels e governaire.