Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 281,007 Autor: Guilhem Ademar Genre: Canso Numero: XI

 Pois vei qu·el temps s'aserena

 

I	1	Pois vei qu·el temps s'aserena
		E s'esmera e meillura
		E per joi de la verdura
		Que·l bels temps clars nos amena,
	5	Estera ben q'ieu chantes,
		Si pogues, e m'alegres.
		Mas so·m tol joi e chantar
		C'ab Amor non puosc trobar
		Merce: malamen mi mena,
	10	Que sol de mi non pren cura.
II		Ben pert m'entent'e ma cura,
		Cum cel que get'en l'arena
		Lo blat et ar'e semena
		E sofre fam et endura,
	15	Per so c'a pro li tornes,
		E pert son trebaill ades.
		Mas nuills hom no·is pot gardar
		Que lai no·l coveign'anar,
		Mal son grat, on s'aventura
	20	E s'escarida lo mena.
III		Lai o·is vol Amors mi mena;
		No·i garda dreich ni mesura,
		Per q'ieu sui en greu rancura.
		C'atressi cum la ballena,
	25	Qand li marinier son sus
		E cuid'estar ferms chascus,
		Ela·ls fai totz perillar,
		Atressi vol de mi far
		Amors, qand aissi·m malmena;
	30	De mort sui en aventura.
IV		Mout ai estraign'aventura;
		Ai las! Cum sui en greu pena!
		Que car mos cors no·is refrena
		D'amar lieis que tant m'es dura,
	35	M'es sos cors escurs e brus;
		No sai que m'en disses plus
		Mas: en qe·is deu hom fïar,
		Qan so q'ieu plus pens amar
		Fai enves mi desmesura
	40	E·m mostr'orgoill e·m malmena?
V		Pechat fai c'aissi·m malmena,
		E no·i garda jes dreitura.
		Ai dompn'on totz jois s'atura!
		Per qe·m tormenta ni·m pena
	45	Tant fort vostr'amors ni vos?
		Ja no vos es negus pros,
		Ni dels sieus mezeis baissar
		- Si·m don de vos bon'estrena
	50	Dieus! - tortz es e desmesura!
VI		Mout es bell'outra mesura,
		Genta, fresca, blanc'e lena,
		Cill qe·m ten en sa cadena.
		De nuill ben no·i a fraichura:
	55	Molt es sos cors bels e bos
		Et ill avinens e pros.
		No la puosc tant gent lauzar
		Cum i saup totz bes formar
		Ab sotil saber Natura;
	60	Mout en desir bon'estrena.
VII		Dompna, s'ieu sui enojos
		De clamar merce vas vos,
		Sapchatz: cocha m'o fai far.
		Per que no·us deu enojar;
	65	Q'ie·us am plus senes mesura
		Que no fetz Paris Elena.
VIII		Dona, si razos vos par,
		Per merce, q'o deiatz far:
		Aleujatz mi la greu pena
	70	Qe·m faitz sofrir aspr'e dura!