Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 009,005 Autor: Guilhem Ademar Genre: Canso Numero: XIII

 Al prim pres dels breus jorns braus

I	1	Al prim pres dels breus jorns braus,
		Quan branda·ls brueils l'aura brava,
		E·ill branc e·ill brondel son nut
		Pel brun tems sec que·ls desnuda,
	5	Per us, brus braus brecs de cor
		Trobadors a bric coratge,
		Fauc breus menutz motz cortes,
		Lasatz ab rima corteza;
		Qu'ieu ai sen sotil fin ferm
	10	Per lieis don non ai fermansa.
II		E si·m sentis, lo cor ferm,
		Que·ill plagues, be·ill fauc fermansa
		Ja mos chantars tritz ni braus
		Non fos ni de razon brava;
	15	Mas tan mi ten de joi nut
		Sill que·m don Dieus tener nuda,
		C'a penas pens en mon cor
		Nuill joi, tant ai trist coratge.
		Quar del sieu bel cors cortes
	20	No·m fai amistat corteza.
III		Be·m tenc per nessi cortes,
		Quar ieu de la plus corteza
		En aitals motz dir m'aferm.
		Dona, ve·us m'aisi fermansa:
	25	Pel sobretalan qu'es braus
		E quar ma volontatz brava
		M'a fait faillir, tot desnut
		Ab la vostra vergua nuda
		M'en batetz lo cors e·l cor,
	30	Tan qu'ieu aia ferm coratge!
IV		Als non dezir en mon cor
		Mas que Dieus vos don coratge
		C'alcun bel semblan cortes,
		Don'avinens e corteza,
	35	Me fezeses ab cor ferm;
		Qu'en autra non ai fermansa.
		E no·m fos vostre cors braus,
		Don'umils, lai on tanh brava,
		Ab cors de totz mals aips nut,
	40	La genser c'anc nasques nuda.